بایاتی

پنجره‌دن ال ائلر،
اللری گل-گل ائلر.
او گؤزلر کی سنده وار،
آخیردا انگل ائلدر.

من عاشیق سیمی گؤزلر،
تار چالان سیمی گؤزلر.
ایلقارین منیمله‌دی،
گؤزلرین کیمی گؤزلر.

عزیزی‌یم یاز گلر،
پاییز گئدر، یاز گلر.
تورو اولان تئز قورسون،
بئله ترلان آز گلر.

اووچو آیاغی گؤزلر،
ائیوان دایاغی گؤزلر.
منده طاقت قویمادی،
باخدی او یاغی گؤزلر.

بو سولار مه‌لر گلر،
داغلاری دلر گلر.
یار-یاری چوخ ایسته‌سه،
گئجه‌نی بؤلر گلر.

عاشیق، یاخشی دان گؤزلر،
مۆرغون یاخشی دن گؤزلر.
باخدیقجا شیرین دۆشر،
دویماز یاخشیدان گؤزلر.

ساچین اوجون هؤرمزلر،
سنی منه وئرمزلر.
قوی اؤپوم آغ اۆزوندن،
قارانلیقدی، گؤرمزلر.

عزیزیم، خونو گؤزلر،
شاه دامار خونو گؤزلر.
یارین فیکری، خیالی،
کسیب یوخومو، گؤزلر.

عاشیقم آغا گؤزلر،
بوستانا، باغا گؤزلر.
دؤنوب یاز بولودونا،
ایسته‌ییر یاغا گؤزلر.

داغ دؤشونده نرگیزلر،
بنؤوشه‌لر، نرگیزلر.
بورا بیر ترلان قونوب،
گؤلده سونانی ایزلر.

عزیزیم قارا گؤزلر،
قلم قاش، قارا گؤزلر.
گۆنوم قارا ائیله‌دی
قارادان قارا گؤزلر.

عزیزی‌یم نرگیزلر،
توپ-توپ بیتر نرگیزلر.
بو گۆن بیر مایا گؤردوم،
قولتوغوندا نر گیزلر.

دیکیلیب هارا گؤزلر؟
آختاریر چارا گؤزلر.
منی دیوانه ائدیب،
سنده‌کی قارا گؤزلر.

آرپانی اکن بیلر،
خؽرمانا تؤکن بیلر.
قؽنامایین عاشیقی،
سئودانی چکن بیلر.

عاشیق هر سؤزو بیلر،
ایرینی، دۆزو بیلر.
دردیمی یارا دئیین،
درمانین اؤزو بیلر.

قارا آت نالی نئیلر،
قارا قاش خالی نئیلر.
وفالی یاری اولان
دؤولتی مالی ائیلر.

یاغیش یاغار، نم چیلر،
گۆن بویلانار، دم چیلر.
گل منی تئز گؤتور قاچ،
ال چکمه‌ییر ائلچیلر.

بال توتان شانی نئیلر؟
سئوگی نیشانی نئیلر؟
سنین کیمی ماهجامال
اننیک کیرشانی نئیلر؟

عزیزیم آی اینجیلر،
یوخ سیزه تای اینجیلر.
سنه باخان گؤزلریم
گۆنو گۆندن اینجیلر.

دییرمان اۆستو لکلر،
چؽرمانیب آغ بیلکلر.
اوغلان قؽزدان اؤتری
دیزین-دیزین ایمکلر.