بایاتی

چای آشاغی بوز گلیر،
دسته-دسته قؽز گلیر.
بیر الینده شیش کاباب،
بیر الینده دوز گلیر.

گؤیده اولدوز اللیدیر،
یۆز دئییل، دۆز اللیدیر.
من یاریمی تانیرام،
گؤزلریندن بللیدیر.

عزیزیم نار کیمیدیر،
باغچادا بار کیمیدیر.
آغ بوخاق، مینا گردن،
یاتیبدی قار کیمیدیر.

قالا باشیندا تندیر،
اودون گتیر، گل یاندیر.
اؤیرنمه‌میش ترلانی
سال قوینونا اؤیرندیر.

گؤزلرین سوس کیمیدیر،
آخان اولدوز کیمیدیر.
من سنسیز نئجه یاتیم،
یورغانیم بوز کیمیدیر.

کئچمه، بو چای دریندیر،
ایچمه، سویو سریندیر.
بۆلبوللر باغا گلسه،
تو-بایرام گۆللریندیر.

سحرین دان یئریدیر،
صبح یئری، دان یئریدیر.
بولاق باشی هر آخشام
بیر دسته جان یئریدیر.

کۆر قؽراغی سریندیر،
گیرمه، ایچی دریندیر.
اوغلانی درده سالان
بیر آلاگؤز گلیندیر.

داغلاردا قار اینجیدیر،
گۆللری خار اینجیدیر.
اؤزون دۆرسن، صدفسن،
قوینوندا نارینجیدیر.

بو باغدا نار شیریندیر،
هئیوادان نار شیریندیر.
ساغ اولسون قوهوم-قارداش،
هامیدان یار شیریندیر.

داغ باشی قار گرکدیر،
چن، دومان، تار گرکدیر.
دردیمه درمان اۆچون
طبیبیم یار گرکدیر.

بو کدر نه کدردیر؟
درد، غم چکمه، حدردیر.
هر بیر کسین اؤز یاری،
اؤزگه گلد-گئدردیر.

بو سس منیم سسیمدیر،
آهیمدیر، نفسیمدیر.
منه سووقات گتیرسن،
بیر دسته گۆل بسیمدیر.

عاشیق، باشیم قالدادیر،
جۆیور-جئیران یالدادیر.
گؤزلرین آهو گؤزو،
دیلین، آغزین بال دادیر.

سمندین یئریگندیر،
چک تازیان، یئریگندیر.
دردین عاشیق جانیندا،
قوی قالسین، یئری گندیر.

اوغلان، گؤزون آلادیر،
آتام ائوی قالادیر.
عشقین منی یاندیریر،
محبّت بیر بلادیر.

خدنگین یای ایلندیر،
خاصیلار یاییلندیر.
جئیران زۆلفون حلقه‌سی
یا اقرب، یا ایلاندیر.

عزیزیم ناغارادیر،
چالینان ناغارادیر.
اؤزون بیر آغ مایاسان،
گؤزلرین نه قارادیر؟

بو داغ بو دشت هارادیر؟
کؤنلوم پارا-پارادیر.
من کی سنی سئویرم،
قانین نیه قارادیر؟

اوغلان، آدین آلیدیر،
هامی بیزدن حالیدیر.
وئردیگین قؽزیل اۆزوک
بارماغیمین مالیدیر.