بایاتی

اووچو چؽخاندا دۆزه،
گئجه دؤنر گۆندوزه.
غریبین بیر جانی وار،
او دا قورباندی سیزه.

کاروان گلدی قند ایله،
یۆکون توتدوم قند ایله.
من یاردان آیریلمازدیم،
آییردیلار فند ایله.

من عاشیق اینجه بئله،
کمر چک اینجه بئله.
قوی کور اولسون گؤزلریم
سنی گؤرونجه بئله.

داغلارین باشی ایله،
دیبی‌نین داشی ایله.
یارا بیر نامه یازدیم،
گؤزومون یاشی ایله.

گۆن کئچیر گئدیر بئله،
کئچن گۆن گلمز اله.
بو آرخا سو بیر گلیب،
اۆمید وار بیر ده گله.

گل منی قویوب گئتمه،
نار کیمی سویوب گئتمه.
وور قؽلینجی بوینوما،
سرگردان قویوب گئتمه.

آشیق الده ساز گله،
اؤردک گله، قاز گله.
کؤنلوم اینتیظاردادی،
گؤزله‌ییر کی، یاز گله.

نارینجی اویوب گئتمه،
قابیغین سویوب گئتمه.
من یازیغا رحم ائیله،
اینتیظار قویوب گئتمه.

عزیزیم شیرین گله،
شیرین نار شیرین گله.
فرهاد قایالار چاپار،
گؤزله‌یر شیرین گله.

داغدان بوز آخدی، گئتمه،
یولون توزاخدی، گئتمه.
یاد ائللر، غۆربت ائللر،
مندن اوزاخدی، گئتمه.

عزیزی‌یم گۆن گله،
آی چکیله، گۆن گله.
عؤمرومو بادا وئردیم،
گؤزله‌دیم خوش گۆن گله.

عاشیق، یار آشدی گئنه،
خالین یاراشدی گئنه.
اؤیون نور ایلن دولدو،
قاپین یار آشدی یئنه.

داغدان یئل اسیر یئنه،
صبریمی کسیر یئنه.
گئتدین، منی ائیله‌دین
یولوندا اسیر یئنه.

آراز آخیر قول اۆسته،
خوش گۆنو وار سول اۆسته.
ایسترم یئتم یارا،
یاغی دوروب یول اۆسته.

ائله‌دیمی یۆز دنه،
اینجی، صدف یۆز دنه.
او گۆندن چوخ قورخورام
اینجی‌یه‌سن، اۆز دؤنه.

بیر بۆلبولم کول اۆسته،
بوداق اۆسته، قول اۆسته.
صفردیر، آیریلیقدیر،
گل گؤروشک یول اۆسته.

کؤچ قالیب من گلنه،
ایل ایله تن گلنه.
سییرت کؤهلن آتینی،
اوتوررام سن گلنه.

شئه دۆشوب اۆزوم اۆسته،
نیمچه وئر، دۆزوم اۆسته.
یاردان بیر خبر گتیر،
موشتولوق گؤزوم اۆسته.

ائولری گۆن دۆشه‌نه،
آلما قویدوم نیشانه.
قارا یایلیق یاراشار
یاردان آیری دۆشه‌نه.

یول گئدیر ترتر اۆسته،
تر تؤکولور تر اۆسته.
یار چوخاسی منده‌دیر،
گؤرن نه اؤرتر اۆسته؟