بایاتی

آل اله، بۆز علمه‌نی،
اینجی تک دۆز علمه‌نی.
وفالی دوست اونوتماز،
گؤرمه‌سه یۆز ایل منی.

ساخلارام قورا سنی،
کال سنی، قورا سنی.
سن گئتدین، تئز گله‌سن،
کیم سالدی تورا سنی.

ائلدن آرالار منی،
وورار، یارالار منی.
گؤزلریم یولدا قالیب،
باسیر قارالار منی.

اکیدیم آرپا سنی،
آت گله قؽرپا سنی.
بیلسه‌یدیم آیریلیقدی،
چکردیم سارفا سنی.

من عاشیق گؤزدر منی،
سۆرمه‌دی گؤز درمه‌نی.
سیز الله، قویون گئدیم،
یار یاتماز، گؤزدر منی.

ساخلاسین سلام سنی،
گؤردوم پۆرکلام سنی.
عطّار مالی دئییلسن،
پول تؤکم آلام سنی.

ائله‌می دئیر منی،
یادلارا دئیر منی.
آیریلیق اوزون اولسا،
کامان تک ایر منی.

گلمیشم گؤروم سنی،
قلبیمه هؤروم سنی.
قاپ-باجا باغلانیب،
بس هاردان گؤروم سنی؟

عزیزیم، هؤروم سنی،
دون تیکیم، هؤروم سنی.
علاج او یئره قالیب،
یوخودا گؤروم سنی.

من عاشیق زیل قدری،
قاشلارین میل قدری.
هر صاباح اۆزون گؤرسم،
آچیللام گۆل قدری.

عزیزیم داغلار سنی،
تیلسیمه باغلار سنی.
بیر جۆت مارالیم ایتیب،
گؤز گؤرر، آغلار سنی.

عاشیقین دۆشموش دری،
دۆر گؤرسن دۆش مۆشدری.
یارب، آنارمی اولا؟
من گؤزدن دۆشموشدری.

سو گلیر زین-زینی،
خزل توتوب اۆزونو.
من یارا نه وئریم کی،
گؤسترسین بیر اۆزونو.

گنجه‌نین کۆچه‌لری،
بانلاماز بئچه‌لری.
نئجه سنسیز یاتیم من
بو اوزون گئجه‌لری؟

گؤتور، آس اۆزنگینی،
آستا باس اۆزنگینی.
تانری جانیم آلایدی،
سندن ال اۆزه‌ن گۆنو.

شیروانین گدیکلری،
آلمادیر یئدیکلری.
یادیما بیر-بیر دۆشر
یاریمین دئدیکلری.

گتیردیلر گلینی،
باغلادیلار بئلینی.
یئتیشدی وۆصال گۆنو،
آلدیم اله الینی.

من عاشیق دمده ماهی،
دریادا دمده ماهی.
گۆل یۆزون فیرقتیندن
چکرم دم-دم آهی.

قؽزیل بافتا اینجینی،
دولدورارام چین-چینی.
سن گلینجه درد اویار
اۆرگیمین ایچینی.

چوخ گزدیم قاراباغی،
شیروانی، قاراباغی.
بیر جۆت ترلان ایتیردیم،
بوینوندا قارا باغی.