بایاتی

عزیزیم ایله قالدی،
آی کئچدی، ایله قالدی.
بۆلبوللر اوچدو، گئتدی،
آیریلیق گۆله قالدی.

باخیرسان هارا، قاندی،
اوخ دگیب، یارا قاندی.
یاردان آیری دۆشموشم،
اۆرگیم قارا قاندی.

آشیق، سازا نه قالدی،
عرضم یازانا قالدی.
بۆلبول اینتیظار چکر،
گؤرک یازا نه قالدی.

عزیزیم او دا یاندی،
من گئتدیم، او دایاندی.
آیریلیغا دؤزمه‌دی،
کرم تک اودا یاندی.

عزیزی‌یم نه قالدی،
نه سس کۆیدو، نه قالدی؟
گؤزلریم گؤزلرینه
حسرت قالدی، نه قالدی.

عزیزیم دیلیم یاندی،
آغزیمدا دیلیم یاندی.
آیریلیق بیر اود سالدی،
آلیشدی، دیلیم یاندی.

داغلاردا دومان قالدی،
چن گئتدی، دومان قالدی.
یارین قاییتماغینا،
تکجه بیر گۆمان قالدی.

بو گلن تار چالاندی،
ترلاندی، سار چالاندی.
یاردان آیری دۆشه‌لی
عؤمرومه خار جالاندی.

داغ باشینی قار آلدی،
ترلان اوچدو، سار آلدی.
گئتدین، دردیم آرتیردین،
رنگیم روحوم سارالدی.

عزیزیم گۆلوستاندی،
آچ اوخو، «گۆلوستاندی».
بۆلبولون گؤز یاشیندان
باغچادا گۆل ایستاندی.

یاشیل داغلار قارالدی،
گۆل تک رنگیم سارالدی.
بیر سؤزوم، بیر شکیلیم
سنده یادیگار قالدی.

اووچو گئندن یاییندی،
اوخو مندن یاییندی.
بیر دفعه کیرپیک چالدیم،
گؤزوم سندن یاییندی.

داغ باشینی سار آلدی،
گۆلو باغدا خار آلدی.
یولونو گؤزله‌مکدن
گؤزوم کؤکو سارالدی.

داغلار نه پیس داغلاردی،
یولوم کسیب باغلاردی.
یازیق یاریم غۆربتده،
گؤزو یولدا، آغلاردی.

او گؤرونن آغدامدی،
قارا دامدی، آغ دامدی.
یار یولونا باخماقدان
گؤزلریمه آغ دامدی.

خبری قوش آپاردی،
وطنه توش آپاردی.
گؤزله‌دیم یار کئچه‌جک،
اوندا دا هوش آپاردی.

آت منی آلدی قاشدی،
یوللاریم قایا، داشدی.
آناما خبر وئرین،
منزیلیم اوزاقلاشدی.

داغ باشینی قار آلی،
گۆنوم آغلی، قارالی.
یاردان سوراق گلمه‌سه،
گئدر گؤزوم قارالی.

آرخالیغیم ناریشدی،
قایتانی بیر قاریشدی.
سن آراندا، من داغدا،
بو نئجه سیفاریشدی؟

تۆکو آغل-قارالی،
قلبی اوخدان یارالی.
قوووشماسا یار-یارا،
درددن رنگی سارالی.