بایاتی

گۆللری در، دسته قوی،
گؤتور خونچا اۆسته قوی.
منی سنه وئرمزلر،
یۆز تۆمن ده اۆسته قوی.

سئیر ائیله، آی آرالی،
شمسدن آی آر آلی.
وارمی اولا منیم تک
جاناندان آی آرالی؟

قارادی قاشین، اؤردک،
یاشیلدی باشین، اؤردک.
همیشه جۆت گزردین،
هانی یولداشین، اؤردک؟

عزیزیم، آخیندیمی؟
سو گلیر، آخیندیمی؟
باخین یار گلن یولا،
منزیلی یاخیندیمی؟

گۆن چؽخدی، گۆندور فلک،
آغلاتما، گۆلدور، فلک!
یا منی یارا یئتیر،
یا دا کی اؤلدور، فلک!

آشیق درده ظالیمی،
سالدی درده ظالیمی،
یاردان درمان گلمه‌سه،
مندن درد آزالیمی؟

داغلاردان اسدی کۆلک،
صبریمی کسدی کۆلک.
سئوگیلیم دریادادی،
اسدی‌یین بسدی، کۆلک.

یول ایلن گلن وارمی؟
اویناییب گۆلن وارمی؟
ایتیرمیشم دوستومو،
یئرینی بیلن وارمی؟

باغچامیزین گۆلو شک،
بۆلبولو شک، گۆلو شک.
آیری دۆشدوک، آغلادیق،
گل ایندی ده گۆلوشک.

داغلاردان ائنن وارمی؟
بیر خبر وئرن وارمی؟
آغ اۆزلو، آلا گؤزلو
یاریمی گؤرن وارمی؟

یئریشی آستا ککلیک،
قویروغو دسته ککلیک.
سندن بۆریان بیشیریب،
آپاریم دوستا ککلیک.

عزیزیم بالابانی،
آستا چال بالابانی.
هامی گلدی غۆربتدن،
بس منیم بالام هانی؟

قؽزیل اۆزوک میانی،
دورماز بارماغین قانی.
داغلاردان خبر آلین،
هانی ائللر سولطانی؟

باغچادا باریم هانی؟
گۆل تؤکدو ناریم هانی؟
هامی‌نین یاری گلدی،
بس منیم یاریم هانی؟

سئیر ائتدیک بلکانی،
گۆرجوستان، بلکانی.
یاریندان آیری عاشیق
اولوبدو بلا کانی.

چکدیم یار جفاسینی،
گؤرمه‌دیم صفاسینی.
سیز تانری، قویون گئدیم،
بیر بیلیم وفاسینی.

بو ائللر آل مکانی،
یادینا سال مکانی.
مرد گئدیب غۆربت ائله،
یورد اولوب قال، مکانی.

باغیندا آلما باری،
درد-غمه دولما، باری.
یارنان کئچن گۆنلری
یادیما سالما، باری.

داغ باشی قار مکانی،
باغچالار بار مکانی.
اگیلسین اوجا داغلار،
گؤرونسون یار مکانی.

دورنا تک سۆزمه، باری،
مرجانی دۆزمه، باری.
اۆزونه حسرت قالدیم،
کاغیذین اۆزمه باری.