بایاتی

داغلارین سال بوزلاری،
سال داشی، سال بوزلاری.
هر گئجه گؤزله‌ییرم،
ساییرام اولدوزلاری.

قوبانین آغ آلماسی،
دولودو باغ آلماسی.
یاریم گلنه قالدی
یارامین ساغالماسی.

ائله‌می سو کوللاری،
باسیبدی سو کوللاری.
ائشیتسم یاریم گلیر،
سۆپوررم بو یوللاری.

آشیق ائللر آیری‌سی،
شانا تئللر آیری‌سی.
بیر گۆنونه دؤزمزدیم،
اولدوم ایللر آیری‌سی.

دگیرمانین سو آرخی،
تمیزله‌یین بو آرخی.
گئدیرسن، تئز قاییت، گل،
اینتیظار قویما خالخی.

عزیزی‌یم بیزه گل،
آل یاشیل گئی، بیزه گل.
اۆزون کیرشانی نئیلر،
چک سۆرمه‌نی گؤزه، گل.

قؽزیل اۆزویون قاشی،
یاندی باغریمین باشی.
گئدیرسن، تئز قاییت، گل،
اۆرگیمین سیرداشی.

آخشام اولدو، بیزه گل،
گئی قؽرمیزی تزه، گل.
بیر الینده شیش کاباب،
بیر الینده مزه گل.

قؽزیل اۆزوک یاناشی،
فیروزه‌دندی قاشی.
یاردان آیری دۆشه‌لی
یانیر باغریمین باشی.

عزیزی‌یم دمه گل،
صؤحبته گل، دمه گل.
درد بیلن اؤزو گلر،
درد بیلمزه دئمه گل.

عزیزی‌یم، بالا، گل،
دومانلیدی قالا، گل.
یاری گؤرمک ایسته‌سن،
مین آتین، دؤردنالا گل.

غۆصّه‌یه گل، غمه گل،
کئف ایسته‌سن، دمه گل.
درد بیلن اؤزو گلر،
بیلمه‌یه‌نه دئمه، گل.

دردی دئ دوستونا، گل،
بو یولون راستینا گل.
او واخت سن گله‌جکسن،
قبریمین اۆستونه گل!

آغ دونا بۆرونمه، گل،
اوزاقدان گؤرونمه، گل.
دوستونلا گؤروشمه‌یه
یاد کیمی ارینمه، گل.

عزیزی‌یم شاما، گل،
پروانه تک شاما گل.
گۆنورتا وعده‌لی‌یم،
گئت دولان، آخشاما گل.

بیر نامه یاز، بری گل،
ائیله‌مه ناز، بری گل.
بو یول غۆربت یولودو،
یولونو آز، بری گل.

خویا گل، مرنده گل،
باغدان بار درنده گل.
بیر گلدین، خسته گؤردون،
بیر ده جان وئرنده گل!

عزیزیم آز بری گل،
یولوندان آز، بری گل.
کؤنلومون ایستکلی‌سی،
دیلیمین ازبری، گل.

جئیران، چؤله بیر ده گل،
اؤردک، گؤله بیر ده گل.
بیر گلمیسن، گئتمیسن،
ایل دولانسین، بیر ده گل!

الینده ساز، بری گل،
ائیله‌مه ناز، بری گل.
قؽشی غۆربتده کئچیر،
گلنده یاز بری گل!