بایاتی

داغلاری گز، بری گل،
دیلیمین ازبری، گل.
گئدیرسن، سؤزوم یوخدو،
گلسن، بیر آز بری گل.

قوشوم گل ها، قوشوم گل،
قانادی سؽنمیشیم، گل.
من سنه وفالی‌یام،
بی‌وفا چؽخمیشیم، گل.

منیم یاریم، بستی گل،
کمر بئلیم کسدی، گل.
صؤحبت واختی دئییلدی،
منی یوخو باسدی، گل.

عزیزی‌یم باغدان گل،
یولون آزما، ساغدان گل.
مین آتین یورغاسینی،
سۆر، دومانلی داغدان گل.

چاغیرارام هارای، گل،
هر هفته گل، هر آی گل.
بیر ایله دؤزمک اولمور،
هئچ اولماسا هر آی گل!

گؤزله‌ییرم ها، سن گل،
یوردا آیاق باسان گل.
بیز کی ایلقار وئرمیشیک،
یا من گلیم، یا سن گل!

عزیزینم هر آی گل،
هر هفته گل، هر آی گل.
گؤزوم یوللاردا قالدی،
چاغیریرام هارای، گل!

عزیزینم حسن، گل،
گۆل بوداغین کسن گل.
قلبیم سنی ایسته‌ییر،
یا من گلیم، یا سن گل.

چاغیرارام آغام، گل،
اؤلمه‌میشم، ساغام، گل.
بوینومدا غم زنجیری،
یولوندا دوستاغام، گل!

داغلار دومان اولدو، گل،
حالیم یامان اولدو، گل.
آیا وعده وئرمیشدین،
ایللر تامام اولدو، گل!

آرخالیغی بیچدیم، گل،
اۆستونده آند ایچدیم، گل.
وفالی یار یولوندا
بیر جانیمدان کئچدیم، گل.

باغلاردا بار اولدو، گل،
اریک نوبار اولدو، گل.
وعده وئردین گلمه‌دین،
اۆرک قوبار اولدو، گل!

گؤیرچینم، اوچدوم، گل،
دوست باغینا دۆشدوم، گل.
یاخشی گۆنون آشناسی،
یامان گۆنه دۆشدوم، گل.

چپر-چپر اولدو، گل،
اۆسته قوشلار دولدو، گل.
گؤزله‌مکدن آل رنگیم
سارالیبان سولدو، گل.

قوشوم گل، آ قوشوم گل،
قانادی سؽنمیشیم، گل.
سننن باشقا کیمیم وار،
دیری آیریلمیشیم، گل!

چایدا سولار دوندو، گل،
باغا قوشلار قوندو، گل.
دولاقسیز گئدن اوغلان،
دولاق تامام اولدو، گل.

عاشیقه سن دئ، سن بیل،
زۆلفون اسنده، سن بیل.
من کی سندن آیریلدیم،
جان قالدی سنده، سن بیل.

یار آرخاندا بیر داغام،
یاتمامیشام، اویاغام.
دولا قولون بوینوما،
بیر ساعتلیق قوناغام.

قوینوندا وار هماییل،
ایچ، هم مست اول، هم آییل
گؤزلریمه قان گلدی
گؤزله‌مکدن هم آی، ایل.

هر پالتارا بویاغام،
یاتمامیشام، اویاغام.
سفرکئشم، گئدیرم،
بیر ساعتلیق قوناغام.