بایاتی

گۆللرین یاری بۆلبول،
دردیم وار، قاری، بۆلبول.
گؤرنده ناله چکیر
اؤز گۆلون، ساری بۆلبول.

دولاییدا بولاغام،
باغری زولاق-زولاغام.
دئدین گلیب آپاررام،
یولوندا گؤز-قولاغام.

داغدا دولان، داغدا گۆل،
بوستاندا گۆل، تاغدا گۆل.
بۆلبول اینتیظاردادی،
آچیلماییر باغدا گۆل.

داغلاردا من بولاغام،
سویو زولاق-زولاغام.
هانسی یولدان گلیرسن،
او یولا گؤز-قولاغام.

قهردن بیشنده گۆل،
بوداقدان دۆشنده گۆل.
بۆلبوللر فغان ائیلر
یادینا دۆشنده گۆل.

باغچا ساللام، باغ ساللام،
گۆل دیبینه تاغ ساللام.
یا آختاریب تاپارام،
یا گؤزومه آغ ساللام.

گؤزل گۆل، شاهانی گۆل،
لبی گۆل، دهانی گۆل.
اؤز گۆلومو ایسترم،
بۆروسه جاهانی گۆل.

بولاق اولوب بولاننام،
دؤرد بیر یانی دولاننام.
الین الیمه چاتسا،
سائیل اوللام، دیلننم.

هئیأتلری ساری گۆل،
یاری قؤنچه، یاری گۆل.
گؤزلریندن سیل یاشی،
آیریلیقدی، باری گۆل.

باغا گیرمیشجن وارام،
گۆلون درمیشجن وارام.
یاری یوخودا گؤرسم،
اؤزون گؤرموشجن وارام.

یاخشیدی آلیجان گۆل،
مکانیم آلیجانگول.
بۆلبول یۆز یول یاش تؤکر،
تک بیرجه آلیجان گۆل.

درد الیندن بئزارام،
یارا نامه یازارام.
گؤزله‌ییرم، گلمه‌سن،
عهدیمیزی پوزارام.

ککلیگی بؽچاقلارام،
تۆکلرین ساچاقلارام.
وعده وئریب گلمه‌سن،
بالینجی قوجاقلارام.

قؽزیلگوله حاصارام،
یئل ووراندا اثرم.
دئسه‌لر یارین گلیر،
قوزو قوربان کسرم.

عاشیقم آی آغلارام،
رقیبی آیاقلارام.
یارینان کئچن گۆنو
آنارام، آی آغلارام.

قره‌نفیلم، آل خارام،
آچیلماغا قورخارام.
آی جامالینی گؤرسم،
خسته اولسام، قالخارام.

قارا آتی یاغلارام،
گۆل آغاجا باغلارام.
سئودیگیمه گئتمه‌سم،
گئجه-گۆندوز آغلارام.

ناچارام من، ناچارام،
یامان درده دۆچارام.
یار یادیما دۆشنده
نازبالینجی قوجارام.

هر صاباحدان آغلارام،
اۆزرم جان، آغلارام.
یاردان آیری دۆشموشم،
آه چکیب، قان آغلارام.

بو گئجه اویمامیشام،
باش یئره قویمامیشام.
سن مندن دویموسانسا،
من سندن دویمامیشام.