بایاتی

یایلیغی آغ ساخلارام،
یویارام، آغ ساخلارام.
دولانیب بیزه گلسن،
سنی قوناق ساخلارام.

عاشیقم، داغی گزم،
سینه‌مده داغی گزم.
مطلبیم یاری گؤرمک،
ایشیم نه داغی گزم؟

عزیزیم دایانمارام،
دؤنمرم، دایانمارام.
دئسه‌لر یارین گلیر،
گؤرسم ده اینانمارام.

داغین اتگینده‌یم،
گۆلون بوتاغیندایام.
اؤلسم ده دردیم یوخدور،
یارین اوتاغیندایام.

گئدرم، اوتورمارام،
طعنه سؤز گؤتورمرم.
یۆز ایل یۆز ایله قالا،
سندن ال گؤتورمرم.

بو ائلده بیر دانه‌یم،
ال دگمه، پروانه‌‌یم.
یاریم گئدیب صفره،
دردیننن دیوانه‌‌یم.

داغ باشیندا فانارام،
سؤز-صؤحبتی قانارام.
بیر گۆن اۆزون گؤرمه‌سم،
آلیشارام، یانارام.

آراز اۆسته نانه‌یم،
یئل، اسمه، پروانه‌‌یم.
یاریم گئدیب تیفلیسه،
دلی‌یم، دیوانه‌‌یم.

قره‌نفیلم، دسته‌یم،
بۆلبولم، قفسده‌یم.
گئدین دئیین یاریما،
حسرتیندن خسته‌یم.

عزیزیم چنده گللم،
دوماندا، چنده گللم.
کیم گئتسه، کیم قاییتسا،
من گۆل آچاندا گللم.

بۆلبولم، قول اۆسته‌یم،
شاخ بوداق، قول اۆسته‌یم.
گل اؤپوم گؤزلریندن،
گئدیرم، یول اۆسته‌یم.

داغ آشیب، دۆزه گللم،
سۆرمه چک گؤزه، گللم.
یۆز ایل قازامات چکسم،
چؽخجاغین سیزه گللم.

یاتمیشام، یان اۆسته‌یم،
یارام وار، قان اۆسته‌یم.
باشیم آل دیزین اۆسته،
اؤلورم، جان اۆسته‌یم.

من عاشیقیله گللم،
آی کئچر، ایله گللم.
آیریلیق سیتمیندن
آخیردا دیله گللم.

های سالسان، دادا گللم،
سیرّ وئرمه یادا، گللم.
آغلاما، خومار گؤزلوم،
یا اؤللم، یا دا گللم.

دیندیرمه، دیله گللم،
بۆلبولم، گۆله گللم.
بیر آیا وعده وئردیم،
گؤزله، بیر ایله گللم.

ائل کؤچسه، هارا گللم؟
اۆرگی یارا گللم.
دردیم چوخ، درمانیم یوخ،
آختاریب چارا، گللم.

داغلارا بینه گللم،
گئدرم، یئنه گللم.
بیر دفعه اۆزون گؤرسم،
ایمانا، دینه گللم.

داغدا یورد سالیب، گللم،
ائلینن قالیب، گللم.
گئتدیگین یئری بیلسم،
سوراغین آلیب گللم.

عزیزیم سینه گللم،
داغ آشیب سینه گللم.
تئز قورتاریب، تئز گلسن،
ایمانا، دینه گللم.