بایاتی

دربند یولون کسرم،
یارپاق کیمی اثرم.
یار غۆربتدن گلنده
قوزو قوربان کسرم.

من عاشیقم نه دردیم،
نه درمانیم، نه دردیم.
یار گئتدی، تزه‌لندی،
منیم او کؤهنه دردیم.

بنؤوشه‌یم، من ترم،
کول دیبینده بیترم.
یاری هر گۆن گؤرمه‌سم،
بوینوم ایری بۆکرم.

ائولرینده وار کیلیم،
لال اولسون منیم دیلیم.
گئدنده کۆسدو گئتدی،
گلسه نئجه دیندیریم؟

ائله‌می، گۆل ایسترم،
بۆلبولم، گۆل ایسترم.
من گئدرگی قوناغام،
بیر شیرین دیل ایسترم.

قؽزیلگول اسدی، نئیلیم؟
صبریمی کسدی، نئیلیم؟
یار گئتدی، اۆزو دؤندو،
بو ایمیش قصدی، نئیلیم؟

قاراداغا گئدیرم،
یاغا-یاغا گئدیرم.
ایتیرمیشم یاریمی،
آختارماغا گئدیرم.

باغچا منیم، بار منیم،
هئیوا منیم، نار منیم.
کۆسدورموشدو، کۆسموشدوم،
کؤنلوم آلدی یار منیم.

مجلیسده ساغی گزدیم،
دولاندیم، باغی گزدیم.
یاردان سوراق آلمادیم،
مجنون تک داغی گزدیم.

اۆزول-اۆزول، گؤزلریم،
غمه سۆزول، گؤزلریم.
گؤردوگونو گؤرمزسن،
باخسان یۆز ایل، گؤزلریم.

بیرجه بئله موم ایدیم،
چای ایچینده قوم ایدیم.
باش یاستیقدا، گؤز یولدا،
گلیر سنه اۆمیدیم.

عزیزیم من ده یئتیم،
سن یئتیم، من ده یئتیم.
هامی آرزویا یئتدی،
گۆن اولسون من ده یئتیم.

اریمه‌دیم، موم ایدیم،
تورپاق ایدیم، قوم ایدیم.
ایللر کئچیر، گؤز یولدا،
نه واخت گلر اۆمیدیم؟

ائله‌دیمی من یئتیم،
سن دده‌لی، من یئتیم.
اؤزون مورادا یئتدیم،
دوعا ائله، من یئتیم.

داغلاری گزدیم، گلدیم،
داشلاری دۆزدوم، گلدیم.
آختاردیم، تاپاممادیم،
الیمی اۆزدوم گلدیم.

یاری اووا یوللادیم،
آرخا، نووا یوللادیم.
اؤزوم گله بیلمه‌دیم،
چوخ-چوخ دووا یوللادیم.

یانان چؽراق اولایدیم،
یولدان ایراق اولایدیم.
یاریم سویا گلنده
سرین بولاق اولایدیم.

کهر اۆسته دورایدیم،
کند آشاغی سۆره‌یدیم.
یار اۆزونو گیزله‌دیر،
باری بویون گؤره‌یدیم.

بولاقدا سو اولایدیم،
اۆسته یارپیز اولایدیم.
یار بولاغا گلنده
اوردا یالقیز اولایدیم.

تۆفنگ اولوب آتایدیم،
بیر منزیله چاتایدیم.
دؤشون اۆسته باش قویوب،
شیرین یوخو یاتایدیم.