بایاتی

عاشیقم، یارا جانیم،
زای ائتدی یارا خانیم.
بۆکوم، قویوم قفه‌سه،
آپار، گئت یارا جانیم.

داغلار باشی آل-الوان،
حالیم اولوبدو یامان.
گئدیرم، حالال ائیله،
گلمگیمه یوخ گۆمان.

بو داغدا آزدی جانیم،
اۆزولوب نازدی جانیم.
یاردان خوش خبر گلیب،
او گۆندن سازدی جانیم.

بارماغیمدان چؽخدی قان،
من آند ایچیم، سن اینان.
گلیب یادیما دۆشدو
سنینله کئچن زامان.

غۆربتده قالدی جانیم،
بیر دینیم، بیر ایمانیم.
گل، فلک، قؽیما منه،
گؤروشه وار گۆمانیم.

بیر سؤز آنلا، بیر دم قان،
کؤنلوم اولدو بیر دم قان.
یارا حسرت گؤزلریم
بیر یاش تؤکور، بیر دم قان.

عزیزیم یاری جانیم،
یاریدان یاری جانیم.
یولونا گؤز دیکمکدن،
قالماییب یاری جانیم.

عزیزی‌یم، بینم قان،
اوولاغیم قان، بینم قان.
آیریلیق حسرتیله
دؤندو اولدو سینه‌م قان.

آی دوغدو مینارادان،
اؤلمرم بو یارادان.
یاریمی منه یئتیر،
یئر-گؤیو یارادان.

باغلار تۆکندی باردان،
یاغی کام آلدی یاردان.
نولا بیر خوش گۆن گله،
قورتاراق بیز ده داردان.

قوو تۆکندی چاخماقدان،
سو تۆکنمیر آخماقدان.
یار یاردان نئجه دویسون
پنجره‌دن باخماقدان؟

سو ایچیرم بارداخدان،
اؤپوم قایماخ دوداخدان.
یاخین گله بیلمیرم،
قادان آلیم اوزاخدان.

قوو تۆکندی چاخماقدان،
کئچم دۆشدو توخماقدان.
گؤزلریمه قان دامدی
یوللارینا باخماقدان.

عزیزی‌یم سار داشدان،
اوچوب گئتمیر سار داشدان.
هم یاریمدان آیریلدیم،
هم ده قوهوم-قارداشدان.

سو گؤتوردوم هوووزدان،
سئچیلمرم توووزدان.
منه بیر خبر دئیین
کؤینگی قانوووزدان.

عزیزی‌یم بیر بیریان،
کاباب بیریان، بیر بیریان.
سنله کئچن گۆنلری
سال یادینا، بیر-بیر یان.

گئجه کئچدی قارالدان،
سئچیلمیرسن مارالدان.
نه دردیم وار، نه غمیم،
سنسن منی سارالدان.

داغلارین قاری درمان،
یاراما ساری درمان.
یاریم بیر نامه یازیب،
یاری درد، یاری درمان.

بو داغلارین قاریندان،
دویمادیم نوباریندان.
ذرّه‌جه عشقی اولان
آیریلارمی یاریندان؟

سالیانین یولو فرمان،
تورپاغی گؤزه درمان.
احوالیندان کاغیذ یاز،
هم درد اولسون، هم درمان.