بایاتی

داغین قاری اولایدیم،
سئل تک جاری اولایدیم.
دیلبیلن، سؤز آنلایان،
قؽزین یاری اولایدیم.

اۆرکدن یارالاندیم،
اوخ دگدی، پارالاندیم.
آیریلیق اولماسایدی،
بس نیه سارالاندیم؟

داغلاردا چن اولایدیم،
یولدان کئچن اولایدیم.
سن اکدی‌یین گۆللری
من ده بیچن اولایدیم.

بو داغدان یول سالاردیم،
کاروانی بول سالاردیم.
بیلسه‌یدیم گئتدیگینی،
بوینونا قول سالاردیم.

داغلاردا چن اولایدیم،
چاییر، چمن اولایدیم.
یار بولاغا گلنده
سهنگی من اولایدیم.

چایا بیر توردو آتدیم،
سویو دریایا قاتدیم.
تاپدیم مؤحنت آغاجین،
کؤلگه‌سینده تک یاتدیم.

کیشمیر شالین اولایدیم،
اۆزده خالین اولایدیم.
تانریدان آرزوم بودور،
حالال مالین اولایدیم.

عاشیقم گۆله باخدیم،
بۆلبولم، گۆله باخدیم.
یار سانا وعده وئردی،
شاد اولوب گۆل، آ باختیم.

اۆزوکده قاش اولایدیم،
یارا سیرداش اولایدیم.
قؽزلار اوتوران یئرده
من ده بیر داش اولایدیم.

بیر دردیم وار، کاغیذیم،
سن ائیله جار، کاغیذیم.
یئتنده یار یانینا،
دیل آچ، یالوار، کاغیذیم.

بولاقدا داش اولایدیم،
داشلا سیرداش اولایدیم.
سویا گئدن قؽزلارا
هر گۆن یولداش اولایدیم.

اوخ گئتدی، قالدی یاییم،
گؤیه قالخدی هاراییم.
قیسمتیم آیریلیقدی،
گؤروشده یوخدو پاییم.

یوخ عاشیق، نئجه ساییم؟
امییم نئجه ساییم؟
یارسیز کئچن گۆنلری
عؤمرومه نئجه ساییم؟

عزیزیم یاری جانیم،
سانجیبدی آری جانیم.
یاردان آیری دۆشه‌لی،
قالماییب یاری جانیم.

یاغیدان گئن دولانیم،
سنینله تن دولانیم.
تئز گل، اینتیظار قویما،
باشینا من دولانیم.

باغ اولدوم، بوستان اولدوم،
دیللرده داستان اولدوم.
اۆچ گۆنلوک آشنا اۆچون
یۆز ایللیک دوستدان اولدوم.

گؤیدن گئدن ترلانیم،
یار بوینوندان ساللانیم.
چکدیر شکلینی گؤندر،
اونا باخیم آللانیم.

عاشیقم داغی گؤروم،
سینه‌مده داغی گؤروم.
مطلبیم یاری گؤرمک،
ایشیم نه داغی گؤروم؟

وای منیم قارا جانیم،
بۆرونوب تارا جانیم.
گؤزون قوربانی، گؤی آت،
تئز یئتیر یارا جانیم.

دادا چاتانا قوربان،
کؤینک کاتانا قوربان.
اؤز یاریندان خبرسیز
یالقیز یاتانا قوربان.