بایاتی

داغلارین یاغیشیندان،
تنگیندن، آخیشیندان.
بو گئدیش عؤمورلوکدو،
دویموشام باخیشیندان.

یول اۆسته واردی خؽرمان،
ائل کؤچدو، قالدی خؽرمان.
آیریلیق خسته‌سی‌یم،
ساغالتماز داوا-درمان.

باغ گزدیم بار اوجوندان،
هئیوا یوخ، نار اوجوندان.
باتیبدی یاسا کؤنلوم
سنین تک یار اوجوندان.

دولاننام فراقینان،
الده‌کی یاراغینان.
یار گئدیب، بیر خبر یوخ،
آختاررام سوراغینان.

اوت بیچدیم اوراغینان،
گزیردیم قؽراغینان.
ایتیردیگیم نازلی یار
تاپیلدی سوراغینان.

عزیزیم اۆزوم دیلدن،
خبر وئر اۆزوم، دیلدن.
سنین شیرین آدینی
من نئجه اۆزوم دیلدن؟

آراز آخار آخیمنان،
سویو دورماز آخیمنان.
یاردان نئجه دویوم من،
بیرجه کره باخیمنان.

جانیمدان، جسه‌دیمدن،
بیلمرم کس اتیمدن.
آیریلدیق، دردیم آرتدی،
هر گۆنکو دستیمدن.

چؽخیبدی دۆزه جئیران،
دۆشوبدو ایزه جئیران.
چوخ ترلان اوولامیشام،
گؤرونمور گؤزه جئیران.

بیر قوش گلیر یمندن،
اۆز الینی تا مندن.
آیریلیق فلکدندی،
نه سندندیر، نه مندن.

های سالدیم اویاناسان،
گۆللره بویاناسان.
یاردان منه بیر خبر،
سن مندن او یاناسان.

یول کئچیر کسمندن،
سو سندن، کاسا مندن.
قورخورام غریب اؤله‌م،
یار اۆمید کسه مندن.

گئدرم ائلینیزدن،
دۆشرم دیلینیزدن.
بیر یاشیلباش سونایام،
اوچارام گؤلونوزدن.

عزیزی‌یم بار مندن،
هئیوا مندن، نار مندن.
گلمیشدیم کؤنلون آلیم،
اینجی‌ییبدی یار مندن.

عزیزیم سؤز دئمکدن،
یورولدوم سؤز دئمکدن.
نه سن یولدان یورولدون،
نه من یول گؤزله‌مکدن.

گئدیرم اؤلکه سندن،
قورخورام یولکه‌سندن.
گل بیر اۆزونو گؤروم،
آیریلدیم بلکه سندن.

عاشیق یول گؤزله‌مکدن،
ساغ-سول گؤزله‌مکدن.
نه سن یولدان اسیرگه،
نه من یول گؤزله‌مکدن.

دؤندوم اغیار ائلیندن،
جان قورتاردیم فعلیندن.
قؽزیل کمر اولایدیم،
قوجایدیم یار بئلیندن.

سالدی منی غم الدن،
قویماز گلم، دم الدن.
گئتسه، قوی اغیار گئتسین،
گئتمه‌سین همدم الدن.

عزیزیم، سؤزلریندن،
دویمادیم سؤزلریندن.
بیلسه‌یدیم آیریلیقدی،
اؤپردیم گؤزلریندن.