بایاتی

آشیق دئیر اؤزوندن،
یارین آلا گؤزوندن.
آیریلدیم سئوگیلیمدن،
هئچ دویمادیم سؤزوندن.

مارال کئچیر ائنیشدن،
بوینوزو وار گۆموشدن.
منه ده بیر پای گؤندر،
قوینونداکی یئمیشدن.

آشیق دؤنمز سؤزوندن،
سؤزون دئیر اؤزوندن.
نولا کامیم آلایدیم،
یارین خومار گؤزوندن.

سو گلیر آخماق ایلن،
قایالار یؽخماق ایلن.
گؤزلدن گؤزمو دویار
اوزاقدان باخماق ایلن؟

عزیزیم آغ اۆزوندن،
کفین آل یاغ اۆزوندن.
سنی دئییب گلمیشم،
گل اؤپوم آغ اۆزوندن.

تامبور ایلن، ساز ایلن،
اؤردک ایلن، قاز ایلن.
بیرجه گئجه یاتایدیم
سئودیجی‌ییم قؽز ایلن.

عزیزیم گۆل اۆزوندن،
تؤکولوب گۆل اۆزوندن.
اۆرکده حسرتیم وار،
قوی اؤپوم گۆل اۆزوندن.

بولاغین باشی ایلن،
دیبی‌نین داشی ایلن.
یارا بیر نامه یازدیم
گؤزومون یاشی ایلن.

سال گئدر کۆر اۆستوندن،
مین آتین، سۆر اۆستوندن.
بو تر شفا تریدی،
اؤلمرم، دور اۆستومدن.

ائل-اوبادا، کاتدا من،
کام قویمارام یاددا من.
گلینجه یول گؤزلرم،
قاللام کبین آلتدا من.

سۆر آتینی دۆز یئردن،
آیاقلارین اۆز یئردن.
سنسیز یارام ساغالماز،
گلسه طبیب یۆز یئردن.

آلدیم اله اسا من،
گلدیم چؽخدیم یاسا من.
باغبان گۆلدن آیریلدی،
فغان ائتدی یاسمن.

چکیلمز دومان یئردن،
کۆسرلر اومان یئردن.
بیر مارال ایتیرمیشم،
گزیرم گۆمان یئردن.

گؤی اۆزونده پرده من،
یامان دۆشدوم درده من.
اؤیرتدین سینه‌ن اۆسته
نئجه یاتیم یئرده من؟

ائله‌می یار ایچردن،
سؤک باغریم، یار ایچردن.
گئتدی گؤزوم قاراسی،
چؽخمادی یار ایچردن.

خسته منم، خسته من،
یورغونام، شیکسته من.
دردین قوی دردیم اۆسته،
چکرم آهسته من.

هارای گۆل، هارای چمن،
جارچی من، هارایچی من.
یاری سوراق ائتمکدن
اولموشام هارایچی من.

ائله‌دیمی یاددان من،
اغیاردان من، یاددان من.
یارلا کئچن گۆنلری
چؽخارمارام یاددان من.

بیر دسته بویاغام من،
یاتمامیش اویاغام من.
قاش-گؤزونو سۆزدورمه،
اۆچ آیلیق قوناغام من.

یارانمیشام یوخدان من،
یارالی‌یام چوخدان من.
چوخ قورخورام، آ قارداش،
سنه دگن اوخدان من.