بایاتی

قارادی قاشین سنین،
آغریماز باشین سنین.
همیشه حسرتده‌دی
یارین، یولداشین سنین.

آخار سولار آخماسین،
قوش قانادین چاخماسین.
گئدین، دئیین یاریما،
اؤلدوم، یولا باخماسین.

عزیزیم یوللا گلسین،
داغ آشسین، یوللا گلسین.
اۆرکده نیسگیلیم وار،
بیر نامه یوللا گلسین.

یار قلبیمی اویماسین،
درد اۆسته درد قویماسین.
فلک مردی نامرده
هئچ واخت مؤحتاج قویماسین.

املی‌ییم جانا گلسین،
یئم وئرین، قانا گلسین.
ایتیب تۆلک ترلانیم،
یئرینه سونا گلسین.

لامپانی آلیشدیرسین،
شیشه‌نی یاپیشدیرسین.
عزیز دوستوم کۆسوبدو،
بیر الله باریشدیرسین.

عزیزیم هارا گلسین،
آغ گۆنوم قارا گلسین.
خبر گئتسین یاریما،
دردیمه چارا گلسین.

تامبورون قولو اوزون،
قولونا مرجان دۆزون.
یاریم وار، اوزاقدادی،
من بوردا نئجه دؤزوم؟

ایسته‌مه‌دیم یاد اولسون،
نیشان وئردیم آد اولسون.
اوردان بیر خبر گؤندر،
ملول کؤنلوم شاد اولسون.

ائله‌می، دۆشنده گۆل،
بوداقدان دۆشنده گۆل.
ساری بۆلبول قان آغلار،
یادینا دۆشنده گۆل.

ائو تیکدیم، تاغلی اولسون،
باغ سالدیم، باغلی اولسون.
دئییرلر نه واخت گلر؟
دئییرم، ساغلیق اولسون!

نه خوش کئچیر بو شن گۆن،
آتلانان گۆن، دۆشن گۆن.
آغلیم باشیمدان اوینار
یار یادیما دۆشن گۆن.

آشیق یانسین، کۆل اولسون،
حاقا توکّول اولسون.
یارا یایلیق دئمیشم،
حاشیه‌سی گۆل اولسون.

کاغیذین آغا دؤنسون،
بۆلبولون باغا دؤنسون.
قاپیمدان گیر ایچری،
اۆرگیم داغا دؤنسون.

باغ-باغچالار شام اولسون،
یا چینار، یا شام اولسون.
گئج گلیب، تئز گئدیرسن،
اوتور، قوی آخشام اولسون.

عزیزی‌یم لکده وار،
ساری یئمیش لکده وار.
آی جۆت گزن بختور،
هئچ دئمیرسن تک ده وار؟

عزیزیم آیدین اولسون،
آی دوغسون، آیدین اولسون.
ائشیتدیم یارین گلیر،
گؤزلرین آیدین اولسون.

داغ دؤشونده تله وار،
بۆلبول باغدا هله وار.
الیم سندن اۆزولدو،
کؤنلوم سنده هله وار.

آی چؽخسین، آیدین اولسون،
اوجالسین، آیدین اولسون.
یارین غۆربتدن گلیب،
گؤزلرین آیدین اولسون.

مئیوه‌سیز باغدا نه وار؟
بهره‌سیز تاغدا نه وار؟
مجنون خیاللی کؤنلوم،
لئیلیسیز داغدا نه وار؟