بایاتی

خوش گۆن بایرامین اولسون،
گۆلشن سئیرانین اولسون.
نیه گئج-گئج گلیرسن،
جانیم قوربانین اولسون.

داغدا دومان یئری وار،
قاشدا کامان یئری وار.
بیر ایتکیم وار اۆرکده،
سنده گۆمان یئری وار.

وفالینی وار اولسون،
وفاسیزی خار اولسون.
کاش کی بو گلن قوناق
آلا گؤزلو یار اولسون.

داغلاردا قار سسی وار،
بولود یوخ، قار سسی وار.
آتینیزی ناللادین،
یئنه صفر سسی وار.

فلکین بیر باغی وار،
گۆموشدن چارداغی وار.
من یار حسرتینده‌یم،
اۆرکده یار داغی وار.

الیمده عَلَمیم وار،
قؽزیلدان قلمیم وار.
فلک، گل دگمه منه،
اوزاقدان گلنیم وار.

یولون بوزو، آغی وار،
چؽخما یولا، یاغی وار.
دیندیرمه، قان آغلارام،
سینه‌مده یار داغی وار.

قاراباغدا باغیم وار،
باغدا گؤی یارپاغیم وار.
خبرسیز گئدن یاردان
تزه بیر سوراغیم وار.

باشیندا آغ شالی وار،
اؤرتوبدو آغ شالی وار.
چؽخ بیر یوللار اۆستونه،
گؤر کیمه اوخشاری وار؟

قؽرمیزی یاستیغیم وار،
دیواردان آسدیغیم وار.
گؤزله‌ییرم، گلمیرسن،
باغریما باسدیغیم وار.

چایلارین بول داشی وار،
بول سویو، بول داشی وار.
یار غۆربتده داریخمیر،
یانیندا یولداشی وار.

دومانلی داغلاریم وار،
بار وئرمز باغلاریم وار.
گئدیرسن، تئز قاییت گل،
دالینجا آغلاریم وار.

من عاشیقم، بیر آی وار،
بیر اولدوز وار، بیر آی وار
گۆنده گؤردوگوم یاری
گؤرمه‌یه‌لی بیر آی وار.

داغلار، سنده گؤزوم وار،
درده منده دؤزوم وار.
خبر وئر یارین گلسین،
اۆرگیمده سؤزوم وار.

هر فسیلده اۆچ آی وار،
اۆچ اولدوز وار، اۆچ آی وار.
کؤنلوم سنی آرزولار،
گؤرمه‌دیگیم اۆچ آی وار.

درویشم کشکولوم وار،
منیم ده بئش گۆلوم وار.
چاغیرارام، یاریم گل،
سن آچان مۆشکولوم وار.

الیمده عَلَمیم وار،
قؽزیلدان قلمیم وار.
ال چاتمیر، اۆنوم یئتمیر،
اوزاقدان سلامیم وار.

قاراباغدا تالان وار،
زۆلفون اۆزه سالان وار.
گئدیرسن، تئز قاییت گل،
گؤزو یولدا قالان وار.

گئدن، گئتمه، ایشیم وار،
زرگرده گۆموشوم وار.
غریب، غۆربت اؤلکه‌ده
قولو باغلی قوشوم وار.

داغ باشیندا دومان وار،
بولود کئچیب، دومان وار.
یاردان خوش خبر آلدیم،
گلمگینه گۆمان وار.