بایاتی

یار باشا خارا باغلار،
شال باغلار، خارا باغلار.
بیر گۆن سنی گؤرمه‌سم،
اۆرگیم یارا باغلار.

آ داغلار، اوجا داغلار،
هامیدان قوجا داغلار.
آیریلیقدان اۆزولدوم،
من دؤزوم نئجه، داغلار؟

باغچا بار دئییب آغلار،
هئیوا، نار دئییب آغلار.
دریا اۆسته بیتن گۆل،
او دا یار دئییب آغلار.

من عاشیق قوشا داغلار،
وئریب باش-باشا داغلار.
یول وئرین، آنام گلسین،
دؤنمه‌یین داشا، داغلار!

من عاشیق سالی باغلار،
گمیچی سالی باغلار.
گؤزلریم هردن سنی
یادینا سالیب آغلار.

عزیزیم قوشا داغلار،
چاتیب باش-باشا داغلار.
گؤزله‌یین سئوگیلیمی،
دۆشمه‌سین داشا، داغلار.

قار یاغار، دولو باغلار،
یاغیلار دولو باغلار.
یار یادیما دۆشنده
گؤزلریم دولوب آغلار.

عزیزیم گۆلسه داغلار،
سال باشا گۆلسد آغلار.
سندن آیری گؤزلریم،
اینانما، گۆلسه ده آغلار.

گنجه‌نین اۆستو باغلار،
دوماندان تۆستو باغلار.
من یارا نئیله‌میشم،
اینجی‌ییب کۆسدو، باغلار.

باغچاسیز، بارسیز داغلار،
هئیواسیز، نارسیز داغلار.
یارینی ایتیریبدی،
قالیبدی یارسیز داغلار.

سونام باغدا باش باغلار،
دارار زۆلفون، یاش باغلار.
گؤزلری یولدا قالان
اۆرگینه داش باغلار.

عزیزیم قلبی داغلار،
آغ ساچلی، قلبی داغلار.
یار فراقی یاماندی،
یاندیرار قلبی، داغلار.

بۆکوبدو بئلی داغلار،
آغاردیب تئلی داغلار.
یئتیشیبدی آیریلیق،
آخیدیر سئلی داغلار.

خؽرداجا داشدی، داغلار،
سندن یول آشدی، داغلار.
آتی گۆموش بزکلی،
بیر سونام قاشدی، داغلار.

باشی بلگه‌لی داغلار،
دیبی کؤلگه‌لی داغلار.
دورموشام یول آغزیندا،
نه واخت ائل گلی، داغلار؟

آ داغلار، داشدی داغلار،
سندن کیم آشدی، داغلار؟
گؤزلریم یوخو توتدو،
جئیرانیم قاچدی، داغلار.

داغلار، بلگه‌لی داغلار،
دؤشنیب خلی داغلار.
یار اۆز دؤندرسه گئتسه،
اۆرگیم زلی باغلار.

اوو سنده چاشدی، داغلار،
اۆستوندن آشدی، داغلار.
آیریلیغا دؤزورسن،
اۆرگین داشدی، داغلار.

عاشیق مئشه‌لی داغلار،
هزار پئشه‌لی داغلار.
یاری سینه‌نده گؤردوم،
گۆل بنؤوشه‌لی داغلار.

آشیق هارالی، داغلار؟
قلبی یارالی داغلار.
ایسترم دورام گلم،
کسیب آرانی داغلار.