بایاتی

عزیزیم اولو داغلار،
چئشمه‌لی، سولو داغلار.
دیبیندن ائللر کؤچر،
باشیندا بولود آغلار.

خوروز دورار، دان آغلار،
هر گۆن وئرر بان، آغلار.
یار یاردان آیریلاندا
گئجه-گۆندوز قان آغلار.

اولدوزلار باتماز، آغلار،
یاری اویاتماز، آغلار.
ایکی کؤنول آیریلسا،
گئجه‌لر یاتماز، آغلار.

گؤیده گؤیرچین آغلار،
یووادا لاچین آغلار.
سن یادیما دۆشنده
باشیمدا ساچیم آغلار.

من عاشیق، ترتر آغلار،
چای گلر، ترتر آغلار.
یار یارا تای اولماسا،
پۆنهاندا تر-تر آغلار.

آغ دومان قاشا دولار،
ککلیکلر داشا دولار.
یاردان بیر خبر بیلن
یا آغلار، یا شاد اولار.

عزیزیم صاباح آغلار،
شام یانار، صاباح آغلار.
یاریندان آیری دۆشن
دورار، هر صاباح آغلار.

داغلار باشی بوز اولار،
کۆلک اثر، توز اولار.
یاردان بیر خبر گلسه،
منیم دردیم آز اولار.

غریب چکر آه، آغلار،
گاه سئوینر، گاه آغلار.
سندن آیری گؤزلریم،
دورار، هر صاباح آغلار.

داغلاردا آل داش اولار،
تپه داش، یال داش اولار.
آیریلیغا دؤزه‌نین
اۆرگی سال داش اولار.

قارا-قارا بولودلار،
پارا-پارا بولودلار.
منیم درد-دیلیمی
یئتیر یارا، بولودلار.

داغدان ائننده آتلار،
ائنر، دره‌ده اوتلار.
بیر گۆن یاری گؤرمه‌سم،
دؤزمز اۆرگیم، چاتلار.

قلبیمی اوخلادیلار،
سرپوشدا ساخلادیلار.
سنین کیمی گؤزه‌لی
کیمه آداخلادیلار؟

باغچا بارین آرزولار،
شیرین نارین آرزولار.
یاد ائلده گزن عاشیق
بیرجه یارین آرزولار.

گؤیده‌کی ترازیلار،
کؤنلوم سنی آرزیلار.
نه اولا بیر گله‌یدین،
گؤره‌یدی تامارزیلار.

بو داغدا چؽراق یانار،
باخدیقجا ایراق یانار.
سئوگیلی سئوگیلیدن
آیریلسا، اۆرک یانار.

سو گلر، سئل آیریلار،
آغ اۆزدن تئل آیریلار.
دئ، خوروز بان وئرمه‌سین،
او اینجبئل آیریلار.

یول اۆستونده وار پینار،
یانیندا قالخیب چینار.
بیزیم بو مۆشکول ایشی
دۆزلتسین پروردیگار.

عزیزی‌یم تات آنلار،
تاتین دیلین تات آنلار.
نه‌لر چکیر گئجه‌نی
تک اوتاقدا یاتانلار.

گئدیرسن، منی آپار،
یوخسا قیامت قوپار.
اوتوروب بیر آه چکسم،
دالینجا سئللر قوپار.