بایاتی

گئتمه، قیامت قوپار،
گئتسن، منی ده آپار.
آپارماسان، گؤز یاشیم
آختارار، سنی تاپار.

داغلار، منه قار گؤندر،
اسیرگه‌مه، بار گؤندر.
یا دردیمه شریک اول،
یا درمانین وار گؤندر.

گۆن دؤنر، آیا چاتار،
هر گۆن هر آیا چاتار.
باشیم جلّاد الینده،
الیم هارایا چاتار؟

بۆلبوللر باغدا گزر،
شاماما تاغدا گزر.
ائلده یاد اووچو گؤروب،
مارالیم داغدا گزر.

زۆلفون تؤک بئله، دیلبر،
تومار چک تئله، دیلبر.
یئتر اینتیظار قویدون،
دولان گل بئله، دیلبر.

داغلاردا مارال گزر،
تئللرین دارار، گزر.
من یارا نئیله‌دیم کی،
یار مندن کنار گزر.

بولود هاوادا گئدر،
قلم داواتا گئدر.
بۆلبول گۆلون آختاریر،
دورماز یووادا، گئدر.

دریادا فانار گزر،
هر آخشام یانار، گزر.
ائلدن آیری دۆشنلر
گۆنلرین سانار، گزر.

بو یول جورادا گئدر،
دؤنر جورادا گئدر.
اوچوب کؤنلومون قوشو،
نئجه هاوادا گئدر.

الینده فانار گزر،
اود توتار، یانار، گزر.
اۆمیدیم بیر یارادیر،
او دا کی کنار گزر.

آشیق گیلانا گئدر،
آشار گیلانا گئدر.
بختور او کسه کی،
قدرین بیله‌نه گئدر.

یئریشین قازا بنزر،
بویون شاهبازا بنزر.
بیرجه اۆزونو گؤرسم،
قؽش گۆنوم یازا بنزر.

گۆن گلر، باتار گئدر،
دورنالار قاتار گئدر.
وفالی‌یا جان قوربان،
بی‌وفا آتار، گئدر.

بو گلن نازا بنزر،
یئریشی قازا بنزر.
سن گلن گۆن ائویمده.
قؽش اولسا، یازا بنزر.

اوولا، بیزه قاز گؤندر،
چوخ اولماسا، آز گؤندر.
اگر گله بیلمه‌سن،
اؤز دردینی یاز گؤندر.

عزیزیم قارا چکر،
قاشلارین قارا چکر.
یار مندن کۆسوب گئتسه،
قلبیمی دارا چکر.

عزیزی‌یم مرد چکر،
نامرد چکمز، مرد چکر.
قؽزلار گلین گئدنده
دول آروادلار درد چکر.

یولچولار یولو گؤزلر،
داغلاری دولو گؤزلر.
آناسی غۆربتده‌دیر،
بالاسی یولو گؤزلر.

عزیزی‌یم گئج ائلر،
درده درمان گئج ائلر.
من کی یارسیز دؤزمورم،
یاریم منسیز نئجئلر؟

آراز داشاندا بیلر،
کۆر قوووشاندا بیلر.
یار یاری‌نین قدرینی
آیری دۆشنده بیلر.