بایاتی

فلک ظۆلمون گئج ائلر،
گئج اولسا دا، گۆج ائلر.
ایسته‌دیم دوستا وارام،
دۆشدو قارا گئجه‌لر.

آشیق آوانی نئیلر؟
درده داوانی نئیلر؟
یار یارین اؤزون ایستر،
سلام-دوعانی نئیلر؟

اللرین خؽنا گؤزلر،
اووچولار سونا گؤزلر.
آتما هیجران اوخونو،
ائله‌مه قان، آ گؤزلر!

بو داغلار آهی نئیلر؟
باشین کۆلاهی نئیلر؟
سن اوردان باخ، من بوردان،
گؤرک ایلاهی نئیلر؟

آشیق بیرینجی گؤزلر،
صرّاف بیرینجی گؤزلر.
دوست یولونا باخماقدان
سن ده بیر اینجی، گؤزلر.

بو داغلار آهی نئیلر؟
ایگید پناهی نئیلر؟
اۆمیدینی گل اۆزمه،
گؤرک ایلاهی نئیلر؟

آشیقلار سازی گؤزلر،
ائیله‌یر نازی گؤزلر.
بۆلبول آه-فقان چکر،
بو گلن یازی گؤزلر.

اووسونچو اووسون ائیلر،
تشنه‌‌یه او سو نئیلر؟
یارسیز دیریلمز صمد،
طبیب یۆز اووسون ائیلر.

بو یولدان گئدن گؤزلر،
دایانار ندن گؤزلر.
اینتیظاردی، قوی گئدیم،
او نازیکبه‌دن گؤزلر.

سؤزبیلن دۆزگو نئیلر؟
گؤزللر گۆزگو نئیلر؟
یاردان آیریلان جانیم،
غم سنی اۆزگون ائیلر.

داغ باشین دولو گؤزلر،
ساغ گئدن سولو گؤزلر.
گۆنلر کئچر غۆربتده،
یار یاتماز، یولو گؤزلر.

ائله‌می او گۆن ائیلر،
او قۆزئی، او گۆنئیلر.
یار یارا قوووشاندا
بایرامین او گۆن ائیلر.

داغدا صیّاد سس ائیلر،
اوو گؤرر، هوس ائیلر.
بیر گؤرموشم بویونو،
بیر ده گؤرسم، بس ائیلر.

آراز داشاندا مه‌لر،
کۆر قوووشاندا مه‌لر.
بالا اؤز آناسیندان
آیری دۆشنده مه‌لر.

دورنا سۆزر، سس ائیلر،
سس ائیلر، هوس ائیلر.
حصیرین اۆسته بیر یئر،
ایکمیزه ده بس ائیلر.

داغدا مارال خوش مه‌لر،
خوش اینیلدر، خوش مه‌لر.
سنسیز بیر آه چکرم،
داغ اینیلدر، داش مه‌لر.

تندیر اۆسته کؤسؤیلر،
کؤسؤی یانار، هیس ائیلر.
دئسه‌لر یارین گلیر،
سؽنیق کؤنلوم سس ائیلر.

گئجه‌لر، آی گئجه‌لر،
یوخ سنه تای، گئجه‌لر.
یاردان الین اۆزولدو،
گۆنلرین سای، گئجه‌لر.

جئیرانیم دۆزه گلر،
دۆزده اۆز-اۆزه گلر.
یار بعضاًیب چؽخیبدی،
اینشاللاه، بیزه گلر.

گئجه‌لر، آی گئجه‌لر،
گۆن گئدر، آی اینجه‌لر.
بیر دفعه اۆزون گؤرسم،
آغلار گؤزوم دینجه‌لر.