بایاتی

من عاشیق بیر-بیر دۆشر،
اوخ یایدان بیر-بیر دۆشر.
یارلا کئچن گۆنلریم
یادیما بیر-بیر دۆشر.

داغدا بیتن نه دندیر؟
نه داریدیر، نه دندیر.
دئدین گؤزله، گلیرم،
گلمه‌ییرسن، ندندیر؟

یاریم ایراق گئدیبدیر،
جیبده داراق گئدیبدیر.
فیکریم ایله خیالیم
اوندان قاباق گئدیبدیر.

باشیم آغریر ندندیر؟
اۆرک زدن-زدندیر.
سندن آیری دۆشمه‌ییم،
بیلمیرم کی، ندندیر؟!

کۆر قؽراغی سریندیر،
گیرمه، اوغلان، دریندیر.
اوغلانی درده سالان
آلا گؤزلو گلیندیر.

نازبالیش باش آلتدادیر،
قارا گؤز قاش آلتدادیر.
آرزوم وار دوروم گلیم،
قوللاریم داش آلتدادیر.

داغ باشیندان سس گلیر،
ائله بیل بیر کس گلیر.
یار گؤندرن نامه‌دن
بیر ایستی نفس گلیر.

قره‌نفیل قوتودادیر،
خومار گؤز یوخودادیر.
بیر گؤزوم یورولاندا،
بیر گؤزوم قاپیدادیر.

عزیزیم ندن گلمیر؟
غۆربته گئدن گلمیر.
هامی گئدنلر گلدی،
یار گئدیب ندن گلمیر؟

بو گؤرونن قالادیر،
دؤرد بیر یانی تالادیر.
یاری سئومک شیریندیر،
آیریلماق بیر بالادیر.

عجب حیکمت، غریب سیر،
آچا بیلمز غریب سیر.
خیالین گلمی‌ین گۆن
عاشیق آلار، قریبسیر.

بو قالا بیر قالادیر،
دؤرد بیر یانی تالادیر.
آیریلماق آسان ایشدیر،
گؤروشمک بیر بالادیر.

من عاشیقم یار اسیر،
بایقو وئرمیش یارا سیر.
یۆزون گؤرمه‌یه کؤنلوم
زۆلفون کیمی یار اسیر.

گئدیرم، یولوم داغدیر،
عجب مئیوه‌لی باغدیر.
یولونو من گؤزلرم،
نه قدر جانیم ساغدیر.

گؤیده اولدوز جیدادیر،
جانیم یارا فدادیر.
غم چکمه، مارال گؤزلوم،
مطلب وئرن خودادیر.

قالانین داشی آزدیر،
اۆستونده کاشی آزدیر.
وئرمه‌دیلر یاریمی،
دئدیلر یاشی آزدیر.

قؽزیل گۆللر کولدادیر،
ال چاتمایان قولدادیر.
قؽز اۆرگی دؤیونور،
اوغلان گؤزو یولدادیر.

اصلیم قاراباغلیدیر،
سینه‌م چارپاز داغلیدیر.
نه گئدن وار، نه گلن،
دئین یوللار باغلیدیر؟

بۆلبول اوخور، کولدادیر،
شاخ بوداقدا، قولدادیر.
نه قدر گلمه‌میسن،
گؤزوم ائله یولدادیر.

آی چؽخیبدی، یاریدیر،
گؤی اۆزونون باریدیر.
یار دردی هر عاشیقین
بئلین بۆکر، قاریدیر.