بایاتی

بو آیین آلتی‌سیدیر،
کؤرپونون آلتی سودور.
یاری خلوتده گؤرمک
کؤنلومون آرزوسودور.

پیالن دولو خوبدور،
ایچمه‌یه دولو خوبدور.
دوست گزن یئری گؤردوم،
گؤزلریم دولوخوبدور.

اوغلان، گئتمه، آماندیر،
حالیم منیم یاماندیر.
گل اینجیتمه منی سن،
اؤز باشینا دولاندیر.

گئدن، گئتمه، دایان، دور،
حالیم سنه عیاندیر.
گلیشینه من قوربان،
گئدیشین نه یاماندیر.

ساری گۆلوم ساماندیر،
گۆنوم گۆندن یاماندیر.
سندن منه بیر خبر،
باغریم چاتلار، آماندیر.

یاشیلیم، آبیم یوخدور،
بو یئرده بابیم یوخدور.
گئدیرسن، تئز قاییت گل،
غۆصّه‌یه تابیم یوخدور.

داغلار باشی دوماندیر،
منیم حالیم یاماندیر.
نه چوخ سۆردو آیریلیق،
بلکه آخیر زاماندیر؟

مخمرم، بابیم یوخدور،
یاشیلام آبیم یوخدور.
کۆسولوسن گل باریش،
کۆسویه تابیم یوخدور.

بو داغدان یول آیریلیر،
آغ اۆزدن تئل آیریلیر.
اؤلورم، جانیم چؽخیر،
او اینجبئل آیریلیر.

عزیزیم گۆلدور، گۆلدور،
آت اوخون گۆلدور، گۆلدور،
یارا حسرت گؤزلریم
یاش تؤکر گۆلدور-گۆلدور.

سویوق ایستی چاغیریر،
دومان تۆستو چاغیریر.
باش یاسدیقدا، گؤز یولدا،
دیلیم دوستو چاغیریر.

داغلار باشی تۆتوندور،
کیمین قلبی بۆتوندور.
اگیل اۆزوندن اؤپوم،
دۆنیا اؤلوم-ایتیمدیر.

یاغیش تؤکور، چای داشیر،
دیندیرمه، دیلیم چاشیر.
صاباح صفر گۆنودو،
قولون بوینومدان آشیر.

بو گلن اۆسکولودور،
الینده یاسگولودور.
نئچه یئردن یارام وار،
او دا یار نیسکیلیدیر.

سؤزو قانا-قانا دور،
چکین، یانا-یانا دور.
داها منی گؤرمزسن،
سؽزلا، یانا-یانا دور!

کاروان یولا دۆزولور،
آلا گؤزلر سۆزولور.
نئجه من آغلاماییم،
الیم یاردان اۆزولور.

چایدا بالیق اۆزوشور،
سیرم-سیرم دۆزوشور.
یار یاردان آیریلاندا
تر قورویور، اۆز اۆشور.

قؽزیلگول خندان اولدو،
درمه‌دیم، دن-دن اولدو.
من سندن آیریلمازدیم،
آیریلیق سندن اولدو.

ائوین دالی قاراغات،
قاراغاتدان یارا آت.
یاردان مانا بیر خبر،
من ده اولوم فاراغات.

داغا گئتدیم، قار اولدو،
داغ باشیما دار اولدو.
بۆلبول باغچادان اوچدو،
کؤنلوم ائوی خار اولدو.