بایاتی

کاروان یولا دۆزولدو،
ساغدان-سولا دۆزولدو.
آرزوم، کامیم آلمامیش
الیم یاردان اۆزولدو.

گؤیدن بیر بالا دۆشدو،
دولاندی، دالا دۆشدو.
یار بیر نامه گؤندردی،
او دا کی قالا دۆشدو.

بولوددان نور سۆزولدو،
ائل یایلاغا دۆزولدو.
ائل یایلاقدان گلینجه
یاری جانیم اۆزولدو.

آی چؽخدی، دۆزه دۆشدو،
قؽوریم تئل اۆزه دۆشدو.
فلک بیر ایش ایشله‌دی،
آیریلیق بیزه دۆشدو.

بوردان بیر آغا دؤندو،
ساللاندی، باغا دؤندو.
یاریم غۆربتدن گلدی،
اۆرگیم داغا دؤندو.

عزیزیم اۆزه دۆشدو،
سۆرمه چک، گؤزه دۆشدو.
هر کس اؤز کئیفینده‌دی،
آیریلیق بیزه دۆشدو.

آی دوغدو، یانا دؤندو،
اولدوزلار سانا دؤندو.
بالا دردین چکمکدن
اۆرگیم قانا دؤندو.

تئللرین اۆزه دۆشدو،
یئل ووردو، اۆزه دۆشدو.
یار یاریندان آیریلدی،
مجنون تک دۆزه دۆشدو.

گۆل اکدیم، لکه دۆشدو،
شاماما یئکه دۆشدو.
یولونو گؤزله‌مکدن
گؤزومه لکه دۆشدو.

گنجه‌نین تالخ اۆزومو،
یئمه‌یه تالخ اۆزومو.
قویوب گئتمه منی سن،
دانلایار خالخ اۆزومو.

پنجره‌دن گۆن دۆشدو،
گۆن دۆشدو، باغریم بیشدی.
آلا گؤزلو جانانیم
گئنه یادیما دۆشدو.

هۆندور داغین دۆزونو،
ایتیرمیشم ایذینی.
بیرجه گؤرمک ایستردیم
عزیز دوستون اۆزونو.

داغلارا دولو دۆشدو،
شئه دۆشدو، دولو دۆشدو.
قبیریمی یول اۆسته قاز،
بلکه یار یولو دۆشدو.

آچیب گۆللر اۆزونو،
بۆلبول دئیر سؤزونو.
چکرم یار حسرتین
آیلار، ایللر اوزونو.

آخشاموستو دان اۆزو،
قوشلار اوخور دان اۆزو.
قارداشین خوش صداسی
سنه چاتا دان اۆزو.

باغلاما، آچ اۆزونو،
اؤرتمه او قاش-گؤزونو.
گل منه ناز ائله‌مه،
یئره سالما سؤزومو.

عزیزی‌یم یاس اؤیو،
یاس اوتاغی، یاس اؤیو.
یاندیم یارین اودونا،
اولدوم اوجاق کؤسؤیو.

درد گلیر تندن اؤترو،
یولدان اؤتندن اؤترو.
منیم بوردا کیمسم یوخ،
گلمیشم سندن اؤترو.

آرخالیغیم اۆچدومو؟
دۆیمه‌سی گۆموشدومو؟
گؤز آغلاییر، اۆز گۆلور،
بو دا بیر گۆلوشدومو؟

گلی‌نین تاختینا باخ،
گۆن کئچیر، واختینا باخ.
چوخ دا یاری کیفیردی،
سن اونون باختینا باخ.