بایاتی

آرخالیغیم اۆچدومو،
دۆیمه‌سی گۆموشدومو؟
یاریم گئتدی، گلمه‌دی،
مۆژده‌سی اؤپوشدومو؟!

عزیزی‌یم یاسا باخ،
قارا گۆنه، یاسا باخ.
بو یار منی اؤلدورر،
یا بو گۆندو، یا صاباح.

دئیممه‌دیم سؤزومو،
یولدا قویدون گؤزومو.
گئدیرسن، تئز قاییت گل،
اؤلدوررم اؤزومو.

ایراقدان گلنه باخ،
بیر گئری دؤنه‌نه باخ.
یاری غۆربتدن گلیب،
چؽراغی یانانا باخ.

داغلاری گز، داشا چؽخ،
وور دؤورانین، باشا چؽخ.
دئسه‌لر کی، یار گلیر،
قاباقلارام باش آچیق.

قارداش-قارداش قوش قارداش،
خنجری گۆموش قارداش.
گئتمه غریب اؤلکه‌یه،
چک جیلووو دۆش، قارداش.

گۆن چؽخدی قدیر الله،
تاقسیریم ندیر، الله؟
یا منی یارا یئتیر،
یا دا کی اؤلدور، الله.

گؤرونن داغلار ایمیش،
اۆستونده باغلار ایمیش.
یار یاردان آیریلاندا
نه یامان آغلار ایمیش.

خوش گۆنون آدی قارداش،
آغزیمین دادی قارداش.
آرزولارام، گلمه‌سن،
توتارام یادی قارداش.

داغلارین باشی آغمیش،
قار ایمیش، تزه یاغمیش.
اجل، گل آپار منی،
یارسیز نه یاشاماقمیش.

گؤیدن گئدن قوش قارداش،
خنجری گۆموش قارداش.
باجین سنی آرزولار،
هئچ گلمیرسن توش، قارداش.

اۆزولموشم، اۆزولموش،
خومار گؤزلر سۆزولموش.
گؤرن وارمی منیمتک
علی یاردان اۆزولموش؟

بالام گلیر یاتماغا،
بؤیویوب بوی آتماغا.
صاباح یوخوسو شیرین،
قؽیمیرام اویاتماغا.

سنه نولوبدو، بالا؟
رنگین سولوبدو، بالا.
اویان بیر گۆل یوخودان،
ممم دولوبدو بالا.

قوشلار اوچدو هاوادا،
بالاسی وار یووادا.
گؤزوم بندیوانیندی،
دیلیم سنه دووادا.

لا-لای قوزوم، آغلاما،
اۆرگیمی داغلاما.
یات، یوخون شیرین اولسون،
یوخوما داش باغلاما.

قؽزیلگول بیتیب سودا،
بیرین کس، بیرین بودا.
من دوروم کئشی‌یینده،
سن یات شیرین یوخودا.

لا-لای دئدیم آدینا،
های یئتیشسین دادینا.
بویا-باشا چاتاندا
منی ده سال یادینا.

جانیم بالا، گۆل بالا،
آنا قدرین بیل، بالا.
یامان گۆنون گره‌یی،
چاغیراندا گل، بالا.

داغلارین لالاسینا،
گؤزلرین قاراسینا.
آنالار قوربان اولسون
اؤز کؤرپه بالاسینا.