بایاتی

باغچالار آل اولویدو،
باشیندا شال اولویدو.
گیرئیدیم یار باغینا،
قوروخچو لال اولویدو.

آخشام گلدی، واخت اولدو،
سینه‌م یارا تاخت اولدو.
صؤحبتیم قورتارمامیش
یار گئتمه‌لی واخت اولدو.

سؤز دئین آشیق اولدو،
ائله یاراشیق اولدو.
بو گۆن یار بیزه گلدی،
ائویمیز ایشیق اولدو.

مسکنیم قازاخ اولدو،
اۆرگیم دوزاخ اولدو.
من یارا یاخین گئتدیم،
یار مندن اوزاخ اولدو.

داغلار قارا زیل اولدو،
یاغدی، قار ازیل اولدو.
سندن آیری بیر گۆنوم
منه غرض ایل اولدو.

بوردا بیر ائو قورولدو،
آلتیندا سو دورولدو.
عالمین یاری گلدی،
منیم بوینوم بورولدو.

سن گئده‌لی ایل اولدو،
یاندی باغریم کۆل اولدو.
سنینله اوچان قوشلار
اوخودو بۆلبول اولدو.

سونام گؤلده سان دوردو،
ترلان گؤردو، یان دوردو.
یاریم بیرباشا گئتدی،
اۆرگیمده قان دوردو.

آشیق ندن دم اولدو؟
سؤزوم-سوووم غم اولدو.
بد گۆنده، بد آیاقدا
یار منه همدم اولدو.

قاپیدا چینار قورودو،
چایدا سولار دورودو.
یار یولون گؤزله‌مکدن
چینیم، بوینوم قورودو.

قؽزیلگول هشم اولدو،
درمه‌دیم، هشم اولدو.
سندن آیری دۆشه‌لی
آغلاماق پئشم اولدو.

سو گلر داشا دولو،
قار یاغار قاشا دولو.
یار یاردان آیریلاندا
گؤزلری یاشا دولو.

داغ باشیندان ائن یولو،
داغدا وار بیلن یولو.
گۆل-چیچه‌یه توتارام
یار دؤنوب گلن یولو.

عزیزیم قوما دؤندو،
داش-تورپاق قوما دؤندو.
یار یولون گؤزله‌مکدن
اۆرگیم موما دؤندو.

آغ دوه‌نین اویونو،
چوبان، قایتار قویونو.
گؤرمه‌میشم چوخداندی
نازلی یارین بویونو.

زۆلفونده شانا، دؤندو،
تؤکولدو یانا، دؤندو.
یولونو گؤزله‌مکدن
اۆرگیم قانا دؤندو.

دوست الیندن آل اوخو،
کامانینا سال اوخو.
گؤز یاشی‌یله عرضم وار،
یئتیشجه‌یین آل اوخو.

آی قؽز، آدین هۆرودو،
دومان داغی بۆرودو.
وئردیگین قؽزیل اۆزوک
بارماغیمدا چۆرودو.

داغلارا قار دۆشوبدو،
اۆستوندن تار دۆشوبدو.
گئدیرم، دایانمارام،
یادیما یار دۆشوبدو.

باغلارا سادا دۆشدو،
درد اۆستن قادا دۆشدو.
بولود کئچدی، آی چؽخدی،
یار گلدی، یادا دۆشدو.