بایاتی

آتین، توتون بو بالانی،
شکره قاتین بو بالانی.
شکردن آجی اولسا،
گؤتورون، آتین بو بالانی.

آ لا-لای، بگیم لا-لای،
گؤزل-گؤیچه‌ییم لا-لای.
غۆربت اؤلکه، یاد ائلده،
آرخام، کۆمکیم لا-لای.

لایلا دئییم دۆز، باری،
گل دردیمی اۆز، باری.
بالاما قوربان اولسون
یۆز دول آرواد، یۆز قاری.

لا-لای بئشیگیم، لا-لای،
ائویم-ائشیییم لا-لای.
سن گئت شیرین یوخویا،
چکیم کئشی‌یین، لا-لای.

من اززی‌یم، شونقاری،
دۆلگر یونار یونقاری.
بالاما قوربان اولسون،
دوققوز قوجا، اون قاری.

لا-لای، هر کسیم لا-لای،
سنه نر کسیم لا-لای.
یات، یوخون شیرین اولسون،
اوجالسین سسیم، لا-لای.

الینده وار هاناسی،
قولاغیندا تاناسی.
بیر تویونو گؤره‌یدیم،
اولایدیم بگ آناسی.

لا-لای مارالیم، لا-لای،
صبریم، قرالیم لا-لای.
بؤیو، بیر قوچ ایگید اول،
سنه یار آلیم، لا-لای.

یورد یوخ تالادان ساوای،
گۆل یوخ لالادان ساوای.
آنایا نه عزیزدیر
کؤرپه بالادان ساوای؟

آ لا-لای، قوزوم لا-لای،
آییم، اولدوزوم لا-لای.
سن حاصیله چاتینجا
هر درده دؤزوم، لا-لای.

آ لا-لای، یئنه لا-لای،
جان دئییم سنه لا-لای.
سنه گلن درد، بلا
قوی گلسین منه، لا-لای.

نرگیزی اۆزوم، لا-لای،
یاخانا دۆزوم، لا-لای.
سن بؤیو، من قوجالیم،
تویوندا سۆزوم، لا-لای.

لا-لای، آ بالام لا-لای،
آلینماز قالام، لا-لای.
سنه کج باخانلاری
یاندیرسین نالام، لا-لای.

لا-لای، بۆلبولوم، لا-لای،
ساری سۆنبولوم، لا-لای.
باغچالاردا گۆل چوخدور،
بیر قؽزیلگولوم، لا-لای.

قؽزیلگول بوتام، لا-لای،
عطرینه باتام، لا-لای.
بالام عرصه‌یه گله،
تویونو توتام، لا-لای.

آ لا-لای، گۆلوم لا-لای،
گۆلوم، بۆلبولوم لا-لای.
بؤیو، سنین ساینده
من ده بیر گۆلوم، لا-لای.

بۆرونوب دونا بۆلبول،
کؤچ ائدر سونا بۆلبول.
بالام دیل آچان گۆنو
مات قالدی آنا بۆلبول.

بالاما جان دئمیشم،
آغلاما، جان دئمیشم.
بالام دیل آچان گۆنه
قوزو، قوربان دئمیشم.

یایلیغی کیرلی بالام،
قلبی فیکیرلی بالام.
جاهیل-جوهول ایچینده
منیم شکیللی بالام.

لا-لای دئدیم، جان دئدیم،
یوخودان اویان دئدیم.
سن یوخودان دورونجا،
جانیمی قوربان دئدیم.