بایاتی

لا-لای دئدیم یاتاسان،
دردی، غمی آتاسان.
قؽزیلگول باغین اولسون،
گۆل-چیچه‌یه باتاسان.

یئنی گۆل-چیچک اولسون،
یارپاغی لچک اولسون.
بیر بالا گؤسترین کی،
بالامدان گؤیچک اولسون.

لا-لای دئدیم یاتاسان،
قؽزیلگوله باتاسان.
قؽزیلگول کؤلگه‌سینده
شیرین یوخو تاپاسان.

بالامسان سن، نییمسن؟
آرخامسان، کۆمکیمسن.
من سنین عزیز آنان،
سن منیم دیله‌ییمسن.

اوغول، گل یاراغیمسان،
گۆزگومسن، داراغیمسان.
هر گۆن لازیم اولماسان،
دار گۆنده گره‌ییمسن.

منی اویاق قویان سن،
قؽزیلگوله بویان سن.
اؤپوم قارا گؤزوندن،
بسدیر یاتدین، اویان سن.

لا-لای دئدیم اۆرکدن،
قولوم دۆشدو بیلکدن.
بوی آت، ایگید، جاوان اول،
منی سالما دیلکدن.

داغلاردا لالام سنسن،
آلینماز قالام سنسن.
کیمیم یوخ، کیمسنم یوخ،
بیر شیرین بالام سنسن.

بالام اوینور، یاتمایین،
سؤزونه سؤز قاتمایین.
لایلا دئیین بالاما،
قوی یاتسین، اویاتمایین.

داغ باشینا قار یاغار،
بولود کئچر، آی دوغار.
سنینتک آی پارچاسین
آنالار تک-تک دوغار.

باغین دردیم هئیواسین،
تؤکر کۆلک مئیوه‌سین.
آتا-آنا جان دئیر،
سئور اۆرک مئیوه‌سین.

شان باغلایان آریلار،
قونار گۆله، ساریلار.
بالاما قوربان اولسون
یاشی اؤتموش قاریلار.

بو داغلارین نالاسین،
لاچین وئرمز بالاسین.
من بالامی ایسترم،
بالام ایستر بالاسین.

قاپیمیزدا وار چینار،
یارپاغی دینار-دینار.
منیم بالام کؤرپه‌دیر،
ساخلاسین پروردیگار.

قؽزیلگول باغین اولسون،
باغلار اویلاغین اولسون.
تانریدان آرزوم بودو،
آت مینن چاغین اولسون.

ایگید قالاسین ایستر،
داغین لالاسین ایستر.
من بالامی ایسترم،
بالام بالاسین ایستر.

باغچامیزدا بار اولسون،
هئیوا اولسون، نار اولسون.
سن آیاق آچ، گز، دولان،
دۆشمن گؤرسون، خار اولسون.

دریا، دیبین دریندیر،
سویون قاندیر، ایریندیر.
آتا-آنا عزیزدیر،
بالا جاندان شیریندیر.

بالا، عؤمرون چوخ اولسون،
کؤنلون، گؤزون توخ اولسون.
سنه لایلا چاغیریم،
دۆشمنلرین یوخ اولسون.

قوخوسو گۆلدن گلیر،
گۆلدن، بۆلبولدن گلیر.
بالامین گۆل بئشیکده
یوخوسو بیردن گلیر.