بایاتی

لا-لای بالام، گۆل بالام،
سن منیم سۆنبول بالام.
لایلاییملا یاتاسان،
اویاتسین بۆلبول، بالام.

لا-لای دئدیم، یات دئدیم،
یاستیغا باش آت، دئدیم.
بالا، چکیم نازینی،
بویا-باشا چات، دئدیم.

لا-لای دئدیم، گۆل بالام،
گۆل بالام، بۆلبول بالام.
من سئویندیم سنیلن،
سن ده سئوین، گۆل، بالام!

من سنه قالام دئییم،
گۆل دئییم، لالام دئییم.
یات، اینجیتمه آنانی،
ساغ اولسون بالام، دئییم.

لا-لای بالام، جان بالام،
من سنه قوربان، بالام.
آغلاییبان کؤنلومو
گل ائیله‌مه قان، بالام.

لا-لای منیم ببه‌ییم،
بیر آرزوم، بیر دیله‌ییم.
بد گۆنده، بد آیاقدا
سنسن منیم کۆمکیم.

لا-لای دئدیم، جان بالام،
من سنه قوربان، بالام.
بیر بئله یاتماق اولماز،
دور آچیلیر دان، بالام.

عزیزیم، من دولانیم،
من دؤنوم، من دولانیم.
تانری سنی ساخلاسین،
ساینده من دولانیم.

اویو بالام، یات بالام،
قؽزیلگوله بات، بالام.
شۆتوک باغین باغلاییم،
شیرین-شیرین یات، بالام.

سن منیم بیر دیناریم،
بیر آغچام، بیر دیناریم.
آماندیر، اسمه، کۆلک،
سالارسان، بیردی ناریم.

یول اۆسته بولاق اوللام،
ساریننام، دولاق اوللام.
سن منیم بیردنمسن،
اؤزوم گؤز-قولاق اوللام.

بالام، گل سویون گؤروم،
سروتک بویون گؤروم.
تانریدان آرزوم بودور،
بالامین تویون گؤروم.

لایلاییم، سؤزوم قوربان،
آغلاسان گؤزوم قوربان.
بؤیو، بویا-باشا چات،
بویونا اؤزوم قوربان.

لا-لای دئییم جارچی من،
هارایچی من، جارچی من.
توی گۆنونده اولایدیم
کۆچه‌لرده جارچی من.

من عاشیق قوزو قوربان،
قوچ قوربان، قوزو قوربان.
هر صاباح بویون گؤرسم،
کسرم قوزو قوربان.

خؽرداجاسان، مزه‌سن،
سن هر گۆلدن تزه‌سن.
قوربان اولوم او گۆنه،
آیاق توتوب گزه‌سن.

بونو وئره‌نه قوربان،
کؤنول گؤره‌نه قوربان.
من کی فره دئمیشدیم،
خوروز وئره‌نه قوربان.

لا-لای دئدیم بیله‌سن،
دۆشمه‌یه‌سن دیله سن.
بویا-بوخونا چاتیب،
اوینایاسان، گۆله‌سن.

لا-لای دئدیم اوجادان،
سسیم چؽخمیر باجادان.
تانری سنی ساخلاسین
چیچکدن، قؽزیلجادان.

عزیزی‌یم، زیره‌سن،
ظفرانسان، زیره‌سن.
قوربان اولوم او گۆنه،
بیر قاپیدان گیره‌سن.