بایاتی

داغ باشیندا قالام وار،
اۆرگیمده نالام وار.
خالخین دؤولتی، واری،
منیم ده بیر بالام وار.

بالا دادی بال دادیر،
بالا آدام آلدادیر.
شیرین سؤزون، صؤحبتین
هله سنین دالدادیر.

سؤزو سؤزدن آلان وار،
زۆلفون اۆزه سالان وار.
عزیز اوغلوم، تئز بؤیو،
گؤزو یولدا قالان وار.

بو گؤرونن شیرازدیر،
شاه منزیلی شیرازدیر.
طیفیلیم سنه قوربان،
ممه کیچیک، شیر آزدیر.

ائلین دردی آزاردیر،
درددن، غمدن بئزاردیر.
بالا بالدان شیریندیر،
بالاسیز ائو مزاردیر.

بادام بادامی،
اوغلان آدامی.
قوی ائلچی گلسین،
آلسین قادامی.

باغدا بۆلبول اوخویور،
ساچا سۆنبول توخویور.
بالامی ایله‌ییرم،
ائله بیل گۆل قوخویور.

آی قؽز آدامی،
سؽندیر بادامی.
ائلچی‌یه چای وئر،
آلیم قادانی.

داغدا مئشه‌لیک،
گۆل، بنؤوشه‌لیک.
من همیشه‌لیک
بو بالاما قوربان.

من گؤردوم هاچان گۆنو،
داغلاردان قاچان گۆنو.
یئددی قوربان کسرم
بالام دیل آچان گۆنو.

تۆکندی آهیم،
یوخدور گۆناهیم.
بالام بؤیوسه،
اودور پناهیم.

چکدیم جفاسین،
گؤردوم وفاسین.
بؤیوتدوم اونو،
سۆروم صفاسین.

آغاردی باشیم،
یوخدور سیرداشیم.
قوهوم-قارداشیم
بو بالاما قوربان.

من چالیم اوینا،
قوربان بویونا.
ائل-اوبا گلسین،
سنین تویونا.

گؤردوم نالاسین،
چکدیم بلاسین.
بالام دا ایستر
کؤرپه بالاسین.

قؽزیم قؽزدی،
یۆز تۆمن آزدی.
مینلیگی گتیرین،
قؽزیمی گؤتورون.

چایداکی قازلار،
تۆکون طارازلار.
نیشانلی قؽزلار
بو بالاما قوربان.

داغین مارالی،
گؤزون قراری.
دۆنیانین مالی
بو بالاما قوربان.

گؤیده اولدوزلار،
شاختالی بوزلار،
جئهیزسیز قؽزلار
بو بالاما قوربان.

داغدا آریلار،
شانین یاریلار.
قوجا قاریلار
بو بالاما قوربان.