بایاتی

باغچالار باغا دؤنسون،
باغیم یایلاغا دؤنسون.
بیرجه کلمه دین، دانیش،
اۆرگیم داغا دؤنسون.

عزیزیم های منیمچون،
وئره‌یدین پای منیمچون.
من اؤلسم، سنه قوربان،
سن اؤلسن، وای منیمچون.

قالالار، آی قالالار،
لاچین اوردا بالالار.
آنا بالاسین وئرمز،
بلکه گۆجله آلالار.

بایرام، بایرامین اولسون،
ائللر هئیرانین اولسون.
نیه بله چوخ یاتدین؟
آنان قوربانین اولسون.

بالا دئمه، قان اولار،
یئل اثر، توفان اولار.
بالا گزن یئرلره
آنالار قوربان اولار.

قوربانین قوزو اولسون،
قوزونون یۆزو اولسون.
قوزودان قوربان اولماز،
آنانین اؤزو اولسون.

بۆلبول دولوبدور باغا،
بیر گۆل سالیبدیر داغا.
سایانین قولو اولسان،
سایمایانا اول آغا.

ائله‌دیمی سال بوزا،
بالتا نئیلر سال بوزا؟
قارنی توخ اولان کؤپک
گئجه هۆرر اولدوزا.

عزیزی‌یم بو داغا،
بو قایایا، بو داغا.
مخمر چول نه یاراشیر
بیر پالانلی اولاغا؟!

من عاشیقم نوایا،
بیر قولاق آس نوایا.
نه نامرده بئل باغلا،
نه آها دۆش، نه وایا.

آلتی دریا، اۆست آدا،
سن بو دردی اۆز تا دا.
هر شاگیرد قابیل اولسا،
اوستاد اولار اوستادا.

ای دۆنیا، ملیک دۆنیا،
تپه‌سی دلیک دۆنیا.
یا بیر کؤشکو سارای تیک،
یا بیر کؤلگه‌لیک، دۆنیا.

تزه بوغدا، تر بوغدا،
خؽرمان اۆسته سر بوغدا.
روزودور، برکتدیر
چؤله دۆشن هر بوغدا.

بوخاری‌یا اود قالا،
اودون گتیر، اود قالا.
ائله یاندیر دۆشمنی،
مشهرجن اود قالا.

خبر گئتسین او یادا،
یاتمیش کؤنلوم اویادا.
بی‌وفایا سیرّ وئرمه،
گئدر آچار او، یادا.

اودون گتیر، قوی، قالا،
دولدور قلیان، قوی قالا.
سؤزون اؤتمه‌ین یئرده
اۆرگینده قوی قالا.

کپز داغین باشیندا،
سیرّ وار هر بیر داشیندا.
سن اؤزونه دوست قازان،
دۆشمن اوجاق باشیندا.

اوجادیر بیزیم قالا،
درد گئتمز، یۆز ایل قالا.
بدسیل اصیل آلما،
بویونجا قؽزیل قالا.

آچیبدی باغدا لالا،
بنزر گۆل اۆزه لالا.
ذرّه‌جه صبری اولان
تئز یئتیشر وۆصالا.

ائله‌می نردیوانا،
آیاق قوی نردیوانا.
زر قدرین زرگر بیلر،
نه بیلر هر دیوانا.