بایاتی

زۆلفونو باغدا دارا،
دۆشوبدور باغ دا دارا.
وفالی بیر دوست اۆچون
رومو گز، باغداد آرا.

ائله‌می یاخشی آتا،
پولون وئر یاخشی آتا.
اوغول بدسیل اولسا،
درد چکر یاخشی آتا.

قؽزیشیب چؤلده آرا،
ائل چؽخیبدیر بیارا.
تنبل آجیندان اؤلسه،
ائلدن اونا نه چارا؟

عزیزیم یاخشی آتا،
یار اوخون یاخشی آتا.
سؤزو دئ قوچ ایگیده،
پولو وئر یاخشی آتا.

عزیزی‌یم بو یارا،
گئدر، قالماز بو یارا.
یادا دوست دئمک اولماز،
دوست هارا، دۆشمن هارا؟

دؤران دولاندی چارخا،
گۆن کئچدی قورخا-قورخا.
نامرده یاخا وئرمه،
مرده یانا، یول آرخا.

گز دولان، باغدان آرا،
بۆلبولو باغدان آرا.
باغبانین کؤنلو اولسا،
نه گلیب باغدا نارا؟

من عاشیق ناچار باشا،
درد گلسه قاچار باشا.
نامرده وئرمه سیرّین،
مین اویون آچار باشا.

من عاشیق قلبی نارا،
آی دوغار قلبی نارا.
دیل ایله دوست اولانین
ایش ایلن قلبین آرا.

اوخ آتما سن بو داشا،
بو قایایا، بو داشا.
دۆشمنی ائله وور کی،
کلله‌سیندن بود آشا.

بولود داغدان اوغرانیب،
پارا-پارا دوغرانیب.
قوجا کؤتوک اۆستونده
چوخلو بوداق دوغرانیب.

من عاشیق دومان یئرده،
داغ یئرده، دومان یئرده.
دۆشمن فعلینه دۆشمه،
قالارسان یامان یئرده.

درد الیندن یاندی داغ،
گئتمز سینه‌مدن بو داغ.
آنا گزن آغاجدا
قؽز گزر بوداق-بوداق.

آشیق دئیر سین آیه،
سین یازیلیب سین آیه.
دوغرو سؤزو مرد دانیش،
یالان سؤزدن سین، آیه.

عزیزی‌یم نمن داد،
آغ یۆزوندن نه من داد.
سن اول عدالتلی شاه،
نه سن داد ائت، نه من داد.

مارال باخار تپه‌یه،
اؤزون یؽخار تپه‌یه.
اوبا صاحیبسیز اولسا،
دونوز چؽخار تپه‌یه.

در گۆلو، آت ایگیده،
وارین وار سات ایگیده.
برک گۆنده، برک آیاقدا
یولداشدیر آت ایگیده.

اززینم دۆشمز اله،
مئی ایچن، دۆش مزه‌له.
یاخشی ساخلا گؤزه‌لی،
بیر جاندی دۆشمز اله.

دورنالار دۆزولنده،
قؽی ووروب سۆزولنده.
دۆشمن مورادا یئتر
ال یئردن اۆزولنده.

بولاغین باشی ایله،
دیبی‌نین داشی ایله.
ایگیده آلقیش دئدیم،
گؤزومون یاشی ایله.