بایاتی

بئله آغلاماق اولماز،
اۆرک داغلاماق اولماز.
تۆلک ترلان یئرینده
ساری ساخلاماق اولماز.

باغچانین اۆستو اولماز،
اوجاقسیز تۆستو اولماز.
دوستدان دۆشمن تاپیلار،
دۆشمنین دوستو اولماز.

داغ باشی دوزاخ اولماز،
گۆن قارا، اۆز آغ اولماز.
سن حاق ایشه بویون قوی،
حاق سندن اوزاق اولماز.

ائل آرخاندیر، گۆون گز،
داغدا بیتر گۆونگز.
نه دؤولته بئل باغلا،
نه فلکه گۆون، گز.

زحمتسیز بیر ایش اولماز،
دومانسیز یاغیش اولماز.
گؤیده بیر بولود اولسا،
اوندان قارلی قؽش اولماز.

چوبانی قویون ایمز،
ائیله‌یر تویون، ایمز.
ایگید اوغول دۆشمنه
یالواریب بویون ایمز.

عزیزیم قار قالانماز،
قار یاغماز، قار قالانماز.
دۆشمنی مؤحکم وورسان،
او بیر ده قارغالانماز.

عاشیق یئی ایشین بیلمز،
خالین یئی ایشین بیلمز.
یاپالاق ترلان اولسا،
دیدر، یئییشین بیلمز.

سایاد داغدا تور قورماز،
قوروب بوینونو بورماز.
سؽنیق قابا پینج قویسان،
یئنه گئدر سو، دورماز.

بو گئدن های دا وئرمز،
چاغیررام، های دا وئرمز.
بیر دوست بی‌وفا اولسا،
دوستونا فایدا وئرمز.

گئجه اوزون، آی باتماز،
دردلیلر گئجه یاتماز.
بیر دوست وفالی اولسا،
دوستو یاددان چؽخارتماز.

آشیق سؤزون بیتیرمز،
اووچو اووون ایتیرمز.
اۆزوم گۆنده قالماسا،
دؤنوب سیرکه یئتیرمز.

سئل گلر دۆزه باخماز،
قونور گؤز گؤزه باخماز.
یاری اۆرکدن سئون
هر دئین سؤزه باخماز.

عزیزی‌یم یۆز ها، یۆز،
سونام، گؤلده اۆز ها، اۆز.
دۆشمن گلیب دوست اولماز،
یالواراسان یۆز ها، یۆز.

قلبی داغی یار آشماز،
هیجران بیزه یاراشماز.
ایش گؤرنده اؤز آغلین،
یاد آغلینان کار آشماز.

عزیزیم لنگریدی،
گمی‌نین لنگریدی.
چوخ بیلیب، آز دانیشماق
ایگیدین لنگریدی.

عزیزی‌یم یۆز ایل گز،
یۆز ایل دولان، یۆز ایل گز.
بیر وفالی یار اۆچون
هئچ گزمه‌سن، یۆز ایل گز.

قاشلارین قمریدی،
تئللرین کمریدی.
دوه‌نی سروان ایر،
ایگیدی غم اریدی.

پایام وار، دمیردندی،
مایام وار، خمیردندی.
گلن گۆنه یاخشی باخ،
کئچن گۆن عؤموردندی.

صبر ائله، سانا صبری،
مرد گرک قانا صبری.
هر بیر صبیر تۆکنسه،
تۆکنمز آنا صبری.