بایاتی

سئیر ائله‌دیک فرضندی،
گؤیدن یئره فرض ائندی.
گرک ایگید آتانین
ایگید اولسون فرضندی.

داغ باشی قالا یئری،
گز، دولان قالا یئری.
یۆز جاندان یانان اولسا،
هئچ وئرمز آنا یئری.

الینده فانار ایندی،
آلیشیب یانار ایندی.
سؤز ایچینده سؤز دئمه،
عاریفلر قانار ایندی.

عزیزیم بعضاً، یئری،
گئی ساللان، بعضاً یئری.
درد-غۆصّه اولا بیلمز
آزادلیق گزن یئری.

قره‌نفیل هاچا بنتدی،
سانا، گؤر نئچه بنتدی.
وفالی‌یا جان قوربان،
بی‌وفا هئچه بنتدی.

بویلانیر آغجا پری،
آدلانیر داغ چپری.
اینسان پاخیل اولماسا،
نئیله‌یر باغ چپری.

قارا آتین ککیلی،
تئل-تئل اولوب تؤکولو.
هر یئته‌نه یار دئسن،
یار باجاندان تؤکولو.

گۆل آچیبدی مئشه‌سی،
سؽندی کؤنلوم شۆشه‌سی.
بی‌وفا یار اولانین
آغلاماقدی پئشه‌سی.

قاسید گلدی هاف کیمی،
اینجلمیشدی ساپ کیمی.
گؤزله، یارین قلبینی
قؽرما چینی قاب کیمی.

له‌له اؤلدو، بئز گتی،
آرشین آپار، تئز گتی.
نه قونشودان سؤز آپار،
نه قونشودان سؤز گتی.

اگر سئوسه ائل سنی،
یؽخا بیلمز ائو سنی.
نامرده بویون ایمه،
قوی آپارسین سئل سنی.

من عاشیق آرا ایشی،
زۆلف ایشی، آرا ایشی.
یارینان اؤزون دانیش،
ائو یؽخار آرا ایشی.

یار بیلر یار قدرینی،
تار چالان تار قدرینی.
جفا چکمه‌ین بۆلبول
بیلمز باهار قدرینی.

عاشیقین نم اندیشی،
زۆلف ایشی، کمند ایشی.
باشیما نه‌لر گتدی
عقلیمین کم اندیشی.

باغدان مئیوه در، کیشی،
دریب یئره سر، کیشی.
قؽشی یایدا قارشیلار
آغلی اولان هر کیشی.

آختارما یاد آغالی،
یا دۆزو، یا داغالی.
یئ مالین، سۆر دؤورانین،
یئمه‌سن، یادا قالی.

عاشیق اوو آلسا داغی،
یارام آوالسا داغی.
ناشی اووچو اوو وورماز،
تامام اوو آلسا باغی.

گۆن کئچدی، قارا سالی،
دالینجا قار اسالی.
وعده‌سیز کؤچ ائیله‌ین
اؤزونو قارا سالی.

گزدیم داغی داغلیغی،
یوخدو اونون باغلیغی.
مال-دؤولت گئدر قالماز،
قالار بیر جان ساغلیغی.

آشیق گزر ماحالی،
سؤزله بزر ماحالی.
چوخ گزن، چوخ دولانان
اولار هر ایشدن حالی.