بایاتی

بو گۆن هاوا یاخشیدی،
درده دعوا یاخشیدی.
اوغرونون قازانیندان
بیزیم تاوا یاخشیدی.

گلین، گلین اولمازمی؟
آل-یاشیلی سولمازمی؟
گلین ائودن گئدنده
ائوی ویران اولمازمی؟

عاشیق واریثه قالدی،
یاریم وار ایسه قالدی.
نامرد یؽغدی، یئمه‌دی،
اؤلدو، واریثه قالدی.

آی چؽخدی یان-یانی،
گؤروندو بیرجه یانی.
برک آیاقدا، برک گۆنده
دوستو، دۆشمنی تانی.

داغلارا سالما هایی،
قاچار مارالین تایی.
کؤنلو بدؤی ایسته‌ین
واختیندا آلار دایی.

نامردله مردی تانی،
ائل سئور مرد آتانی.
اوغول فرسیز چؽخاندا
اؤلدورر درد آتانی.

له‌له یئرین آرقالی،
مه‌له‌مز آی آرقالی.
کسکس مئیدانیندا
نامرد قاچار، ار قالی.

داغلارین مئهدی باری،
گۆللرین شئهدی باری.
کاسیبین واری اولماز،
وارلی‌نین اعتیباری.

چوخ گؤردوم قیلو-قالی،
اولدوم ایشیندن حالی.
قاری دۆشمن دوست اولماز،
یئدیرسن یاغی، بالی.

عزیزی‌یم جیداری،
قارشیدا وار جیداری.
هر کسین اؤز عملی
آیاغی‌نین جیداری.

عزیزیم داغا ساری،
یار گلیر داغا ساری.
اطرافدا سار دولانیر،
بوراخما باغا ساری.

چایدا قووار داش داشی،
چاخماق داشی، قاش داشی.
قارداش باجیدان کئچمز،
باجی آتماز قارداشی.

خاللارین اؤز قاراسی،
یاخشیدیر اؤز قاراسی.
سو یویار هر لکه‌نی،
یویولماز اۆز قاراسی.

قره‌نفیل آبی گرک،
یار یارین بابی گرک.
یاد ائلده یار سئوه‌نین
دریاجا تابی گرک.

عزیزیم ایل یاراسی،
آغریدیر ایل یاراسی.
خنجر کسسه، ساغالار،
ساغالماز دیل یاراسی.

باغچالاردا گۆل گرک،
گۆل گرک، بۆلبول گرک.
صیدق ایله دوست اولان کس
اۆرکدن ده بیر گرک.

ائله‌می مرده تاسی،
دولدور وئر مرده تاسی.
نامرد گلیب مرد اولماز،
اولماسا مرد آتاسی.

عاشیق بیرینن گرک،
صدف دۆروینن گرک.
دۆنیادا گؤزل چوخدور،
ایلقار بیرینن گرک.

گؤرن اویدو تالانچی؟
کندی سویدو تالانچی؟
تاماهکاری آلدادار
دوغرو ساتان یالانچی.

عزیزی‌یم تن گرک،
پای بؤلونسه تن گرک.
ساروانلا دوست اولانین
داروازاسی گئن گرک.