بایاتی

داغا یئلبه نه لازیم،
گیرر قلبه، نه لازیم.
آغاجدا بار اولماسا،
اونا سلبه نه لازیم.

قاشلارین قاراسیندان،
خال دۆشوب آراسیندان.
آدام دا ال چکرمی
ایستکلی بالاسیندان؟

عزیزیم چک اوجوندان،
قلیانی چک اوجوندان.
نه نامرده یولداش اول،
نه بلا چک اوجوندان.

باغ سالیب، گۆل اکمه‌ین،
گۆلون یئره تؤکمه‌ین،
بالین قدرین نه بیلیر
آری قهرین چکمه‌ین؟

اینجی بوردان، دۆرر بوردان،
مین آتینی سۆر بوردان.
مجلیسده یئرین تانی،
دئمه‌سینلر، دور بوردان.

آی السن، السن،
عؤمرو وئرمه یئله سن.
هر ایشده صبیرلی اول،
پئشمان اولار تله‌سن.

عزیزی‌یم یان دولان،
نۆقطه‌لرین قان دولان.
یاخشیلارا یولداش اول،
یامانلاردان یان دولان.

داغ-دره‌نی آددان سن،
کئچ آلوودان، اوددان سن.
یولون اوغورلو اولسون،
گؤزله اؤزون یاددان سن.

داغ باشیندا دورماسان،
تورون آتیب قورماسان،
ترلان اوولاماق اولماز،
بینه‌ده اوتورماسان.

من عاشیقم دۆروس دین،
دۆروس ایمان، دۆروس دین.
یا مجلیسده لال اوتو،
یا دینیرسن، دۆروس دین.

گؤرونور اوو دره‌دن،
گئت اونو قوو دره‌دن.
اووچو ناشی اولماسا،
کئچیرمز اوو بره‌دن.

ائل گلسین، ائله دگسین،
مئی اسسین، تئله دگسین.
تک الدن نه سس چؽخار؟
ال گرک اله دگسین.

عزیزیم چئشمه مندن،
چای مندن، چئشمه مندن.
یاد سؤزو یالان اولور،
اینانما، کئچمه مندن.

بۆلبولو باغدا آسین،
گۆل-چیچک توتسون یاسین.
زحمت چکن، باغ سالان،
سۆرر باغین صفاسین.

دگیرمانین پریندن،
سویو چؽخار دریندن.
ائلین سؤزو بیر اولسا،
داغ اوینادار یئریندن.

اۆرک یارا اولماسین،
سؽنسین پارا اولماسین.
رنگین قارا اولسا دا،
قلبین قارا اولماسین.

دییرمانچی چکر دن،
قلیان گؤتور، چک هردن.
نامرددن اوزاق دولان،
نه درد اولسا چک اردن.

داغدان ائننده قویون،
چوبان ائیله‌یر تویون.
سؤز-صؤحبتین بیلمه‌ین
باشا آچار مین اویون.

گۆللرین هشم اولسون،
گۆن وورسون، هشم اولسون.
وار-دؤولتیم اولونجا،
صنعتیم، پئشم اولسون.

الده پیاله‌سی وار،
اۆرکده ناله‌سی وار.
مرده گئت، چیرکین اولسون،
نامردین بلاسی وار.