بایاتی

داغ باشینی قار آلار،
دومان گلر، تار آلار.
ایللر کئچر ساغالماز
سؤزنن دگن یارالار.

عزیزیم ندن باغلار،
پروانه ندن باغلار.
اکمه نامرد زمی‌سین،
نه بیتر، نه دن باغلار.

داغ باشینی قار آلار،
گۆن اییلر، سارالار.
ایگید اؤلر آد قویار،
مۆخننتدن نه قالار؟

عزیزیم داغی دانلار،
آت اوخون داغیدانلار.
ناشی اووچو اوو وورماز،
قاییدی، داغی دانلار.

داغ باشینی قار آلار،
دومان آلار، قار آلار.
اینسان آزاد اولماسا،
عؤمرو، گۆنو قارالار.

آغ آلمانی سویارلار،
آغ بوشقابا قویارلار.
چاغریلمامیش قوناغی
قاش-گؤزونن قووارلار.

عزیزیم داشا چالار،
عؤمرومو داشا چالار.
یئمه نامرد چؤرگین،
قاییدار باشا چالار.

قؽش دولانار، یاز اولار،
گؤلده اؤردک، قاز اولار.
هر نه دئسن قؽزا دئ،
گلین کلکباز اولار.

تۆستولنر باجالار،
اوجاق اۆسته ساج اولار.
زحمت سئون گۆن گؤرر،
تنبل هر واخت آج اولار.

کاباب یانار، کؤز اولار،
نظر دگر، گؤز اولار.
قوهومدان قؽز آلاندا
آرالیقدا سؤز اولار.

داغ باشیندا های اولار،
درد-غم اولسا، وای اولار.
چایلار آخسا، گؤل اولسا،
بولاق سویو چای اولار.

عزیزیم باش آپارار،
سئل گلر، باش آپارار.
خانا نؤکر اولانین
آیاغین داش آپارار.

داغ دؤشونده های اولار،
درد الیندن وای اولار.
ائل بیر یئره یؽغیلسا،
گۆجو جوشقون چای اولار.

عزیزی‌یم سین دورار،
اووچو گزر، سین دورار.
ائل یؽغیلسا، بیر اولسا،
ضربی کرن سؽندیرار.

آخچا دینارمی اولار؟
هئیوا دئ نارمی اولار؟
ایری بیتن بیر سؤیود
گلیب چینارمی اولار؟

عزیزی‌یم سین دورار،
داغدا بولود سین دورار.
سیرکه دؤنوب تۆند اولسا،
اؤز قابینی سؽندیرار.

ائله‌دیمی گۆن اولار،
داغ باشیندا گۆن اولار.
یاخین دوستلا یاد اولماق،
اولسا دا بیر گۆن اولار.

داغ باشینا قوندو سار،
اکدیم آغاج، وئردی بار.
سیرّینی دوستا دئمه،
دوستونون دا دوستو وار.

من عاشیق اودا یاخار،
قلیانین اودا یاخار.
دوست دوستونون یولوندا
جانینی اودا یاخار.

الینده وار بول آچار،
قاپی باغلار، یول آچار.
ایگید آغزینی آچماز،
برک آیاقدا قول آچار.