بایاتی

تۆفنگ آتما، سس چؽخار،
اووو داشدان گز، چؽخار.
یامان گۆنه صبر ائدن
یاخشی گۆنه تئز چؽخار.

کیلیده سالدیم آچار،
کیلید آچیلدی ناچار.
ایگید سیرّ ساخلاماسا،
ائل اوندان اوزاق قاچار.

گؤی اۆزو دامار-دامار،
گؤیدن یئره نور دامار.
اوستادا کج باخانین
گؤزلرینه قان دامار.

آشیق هنکله گئدر،
سالخیم تنکله گئدر.
کلک ایله گلن شئی
دؤنر، کۆلکله گئدر.

داغ باشیندا بیر فانار،
ایللر کئچر، هئی یانار.
سؤز دمیر کیمی شئیدیر،
سن دؤیدوکجه اوزانار

گۆن دولانار، آی گئدر،
بولود تایباتای گئدر.
اوخون گؤز یوموب آتما،
الدن چؽخار، یای گئدر.

عاشیق یاد اولار گئدر،
خالین یاد اولار گئدر.
گؤز گؤرمویه-گؤرمویه،
کؤنول یاد اولار گئدر.

آدام سولسا، اییلر،
یاشا دولسا، اییلر.
حاق سؤزون قاباغیندا
داغ دا اولسا، اییلر.

سو گلر، آخار گئدر،
داغ-داشی یؽخار گئدر.
دۆنیا بیر پنجره‌دیر،
هر گلن باخار گئدر.

سو آخار، دیوان ائیلر،
باغچایا راوان ائیلر.
ایگیدین یاخشی دوستو
عؤمرونو جاوان ائیلر.

یار نازین یارا چکر،
خاللارین قارا چکر.
ائلین گۆجو بیر اولسا،
دۆشمنین دارا چکر.

من عاشیق شیرین ائیلر،
پۆستانین شیرین ائیلر.
یار اؤزو شیرین اولسا،
هر ایشین شیرین ائیلر.

سن آغاسان، من نؤکر،
من ایشلیرم، سن بئکار.
بیر آدام پاخیل اولسا،
عؤمرو بویو درد چکر.

گۆن خوش کئچسه، درد اؤلر،
غۆصّه گئدر، درد اؤلر.
حاق یولوندا جان قویان
آد قازانار، مرد اؤلر.

عاشیق یۆز ایله دگر،
شانا یۆزیله دگر.
ایل وار بیر گۆنه دگمز،
گۆن وار مین ایله دگر.

بولود گلر، یان وئرر،
داغلاری نیشان وئرر.
کلکله دؤران سۆرن
مؤحنت ایله جان وئرر.

من عاشیقم یاد ائللر،
یاد اؤلکه‌لر، یاد ائللر.
بئله سرخوش گزه‌نین
شاماماسین یاد اللر.

کابابی کؤز اؤلدورر،
سۆرمه‌نی گؤز اؤلدورر.
ایگیدی قؽلینج کسمز،
طعنه‌لی سؤز اؤلدورر.

من عاشیق قارا تئللر،
آغ اۆزده قارا تئللر.
نامردله سیرداش اولسان،
قلبینی قارات ائیلر.

داغ باشیندا یئل اثر،
دۆشر اۆزه تئل، اثر.
دوغرو سؤز تئز کار ائیلر،
قؽلینجدان دا پیس کسر.