بایاتی

دوست دوستلا تن یاخشیدیر،
اولماسا گئن یاخشیدیر.
بیر دوستدا سیرّ قالماسا،
اوندان دۆشمن یاخشیدیر.

عزیزی‌یم یاخشی دور،
یاخشی اوتور، یاخشی دور.
اؤز آیرانین تورش اولسا،
یاد آشیندان یاخشیدیر.

عزیزیم بو یاخشیدیر،
ایچمه‌یه سو یاخشیدیر.
کارسیز، اوزاق قوهومدان
یاخین قونشو یاخشیدیر.

بو داغدا صدا چوخدور،
درد-غم چوخ، صدا چوخدور.
دوست مین ده اولسا، آزدیر،
یاد بیر اولسا دا چوخدور.

وۆصال یارین ناخشیدیر،
گؤز کؤنولون باخشیدیر.
اولسا عاقیللی دۆشمن،
نادان دوستدان یاخشیدیر.

اووچودا آمان اولور،
الینده کامان اولور.
اوخلاما یار کؤنلونو،
اوخ دگسه، یامان اولور.

عزیزینم یۆز قاندیر،
اللی قاندیر، یۆز قاندیر.
کعبه یؽخماق بیر ائوسه،
کؤنول یؽخماق یۆز قاندیر،

گؤیدن یئره یاغیر نور،
آغیر اوتور، آغیر دور.
ائل ایچینده دۆز دولان،
گؤرن دئسین آغیردیر.

داغلاردا اوراغاندیر،
یۆره‌ییم دولو قاندیر.
یولسوزو یولا تاپشیر،
یول اؤزو ووراغاندیر.

بولود گلیر قاتهاقات،
بیر بیرینه چاتهاچات.
ایگیدی داردا قویماز
منزیل کسن بدؤی آت.

گؤیده اولدوز آخاندیر،
نه سولطاندیر، نه خاندیر.
فلکه بئل باغلاما،
فلک ائولر یؽخاندیر.

تۆفنگینی یاخشی آت،
یاخشی دولدور، یاخشی آت.
مردین باشین اوجالدار
نجیب آرواد، یاخشی آت.

داغ باشین دومان آلمیر،
یار یارین درده سالمیر.
دؤولت شیرین اولسا دا،
آخیر هئچ کسه قالمیر.

عزیزی‌یم یاخشی آت،
نیشان گؤتور، یاخشی آت.
ایگیدی جاوان ساخلار
یاخشی آرواد، یاخشی آت.

قوروقدا قویون، قوزو،
قویونا وئردیم دوزو.
دؤولته سوسامایین،
ایگیده وئرین قؽزی.

عزیزیم حاقا دوغرو،
آچ قلبین حاقا دوغرو.
دۆنیادا بدبخت اولار
گئدن ناهاققا دوغرو.

یئردن دورسا کوروغلو،
تورون قورصا کوروغلو.
قان سئل کیمی تؤکولر،
بیر قؽی وورسا کوروغلو.

عزیزیم قاندی، اؤلدو،
اودلارا یاندی اؤلدو.
آغاج اگیلدی، سؽندی،
ایگید اوتاندی، اؤلدو.

سۆرو تانیر قوردونو،
ایگید سئور یوردونو.
بیر خاین، بیر ده قورخاق
باتیرار بیر اوردونو.

عزیزیم آرا سؤزو،
صرّاف اول، آرا سؤزو.
اؤز سؤزونو اؤزون بیل،
ائو یؽخار آرا سؤزو.