بایاتی

آلمانی آلما، گلین!
آل یئره سالما، گلین.
ائوده سؤز-سوو چوخ اولار،
اۆرگینه سالما، گلین!

الینده بایدا توتار،
بایدانی چایدا توتار.
یؽغیلار قوهوم-قارداش،
هره بیر قایدا توتار.

گلین، دیلکلی گلین،
جئیران اۆرکلی گلین.
خامیر یوغور، چؤرک یاپ،
آی شیر بیلکلی گلین!

باغبان باغدان وار ایستر،
باغدا هر نه وار، ایستر.
سونسوز باش یئره قویسا،
یؽغیلارلار واریثلر.

کؤینگین چیتدی سنین،
کؤنلون مسجیددی سنین.
چوخمو درده دۆشوبسن،
رنگین اوچوبدو سنین.

بو باخیش قؽیقاجیدیر،
اۆرگیمی آجیدیر.
قارداشین دردین چکن
قارداش دئییل، باجیدیر.

یار تاخیبدی تاناسین،
یاری گلسین ساناسین.
آناسین سئون اوغول
سئور قاییناناسین.

دییرمان بوش دولانیر،
اۆستونده قوش دولانیر.
قوربان اولوم قارداشا،
نیه سرخوش دولانیر.

مممدباغیر باغیندا،
گۆل بیتر بوداغیندا.
یئل وورار یئللندیرر،
سؽرغاسی قولاغیندا.

هشه‌ده، آی هشه‌ده،
بیر قوش توتدوم مئشه‌ده.
آتانین یئددی اوغلو،
هامی‌سی بیر پئشه‌ده.

داغدان گلیر داغالا،
قوللاری بوداق، آلا.
سکسن سککیز جایناقلی،
آز قالیر آدام آلا.

اوتورموشدوم سکیده،
اۆرگیم سکسکه‌ده.
گؤیدن بیر آلما دۆشدو،
بیر قؽزیل نلبه‌کیده.

چؽخدیم قؽز قالاسینا،
اوخ آتدیم یوواسینا.
قوشلاردان هانسی قوشدو،
سۆد وئریر بالاسینا؟

بالتا ووردوم چکیله،
چکیل یئره تؤکوله.
قوشلاردان هانسی قوشدو،
اؤزو دیزه چکیله؟

من عاشیقم، بیر آتا،
بیر اوغولدو، بیر آتا.
سکسن قاتیر، یۆز دوه،
یۆکلنیبدی بیر آتا.

داغ، تپه درمه-درمه،
خاللارین درمه-درمه.
یئتیشمه‌میش نار گؤردوم،
چاغیریر درمه، درمه.

بیر قوشوم وار آلاجا،
اوچار قونار آغاجا.
آغاجدا بیر ائو تیکر،
نه قاپی قویار، نه باجا.

ایکی شاخ، ایکی سینه،
بیری نه، ایکیسی نه؟
بیر آغاجدا بئش آلما،
گۆن دۆشوب ایکیسینه.

آیا باخ، آختالانیب،
قاپیلار تاختالانیب.
مئیدانا بیر آت گلیب،
بورنوننان نوختالانیب.

او ندی کی، گلن یاز،
گلن قؽشدی، گلن یاز.
قؽش بیر خؤرک بیشیردی،
یاغین تؤکدو گلن یاز.