بایاتی

هر قورد ایپک ساریماز،
آیاق توتسا یئریمز.
مین ایل مین ایله قالسا،
یاخشی، یامان چۆرومز.

داغلاردا قار اریدی،
آیاق توتوب یئریدی.
دره گؤروب باغیردی،
دریا گؤروب کیریدی.

عاشیقم، یاسمنسیز،
گۆل بیتمز یاسمنسیز.
عرشده بیر ملک اؤلموش،
گئتمزلر یاسه منسیز.

اونون آدی پریدی،
کؤنلومه مۆشتریدی.
آخشام آنادان اولدو،
سحر دوردو، یئریدی.

بو گۆنلری شنبه‌دی،
کؤنلومه دۆشن ندی؟
نه اتی وار، نه قانی،
اوجاقسیز بیشن ندی؟

دگیرمانا دن گلدی،
قؽرمیزی دون تن گلدی.
توخونمامیش چووالدا
اۆیونمه‌میش اون گلدی.

پسده‌دی، ها پسده‌دی،
شکی شیروان اۆسته‌دی.
یئمیشلردن هانسیدی
چییرده‌یی اۆسته‌دی؟

آخار سویون تک بندی،
تک تهنه‌‌سی، تک بندی.
بیر باغا باغبان اولدوم،
یۆز آرخی وار، تک بندی.

هسده‌دی، آی هسده‌دی،
تاختی روان اۆسته‌دی.
بو یئمیش نه یئمیشدی،
بیر بوداغی اۆسته‌دی؟

باغریم باشی زدندی،
زردندی، زبردندی.
یاشیل اکدیم، آل تؤکدو،
گؤرن اصلی ندندی؟

هاتم هاتم هتده‌دی،
هاتم کوخا کنته‌دی.
دیشی قارنی آلتیندا،
دوداقی دال قاتدادی.

ندندی آی ندندی،
باغریم باشی زدندی.
یارپاغیندا اود یانار،
آغاجی گؤینه‌دندی.

ال-آیاغی دسته‌دی،
قوللاری قفسده‌دی.
نه یئرده‌دی، نه گؤیده،
چرخ-فلک اۆسته‌دی.

ندندی آی ندندی،
باغریم زدن زدندی.
آغاجیندا اود یانار،
یارپاغی گؤی ندندی.

هسته‌دی، آ هسته‌دی،
شکی شیروان اۆسته‌دی.
قؽراغی قؽزیل کرپیج،
اۆستو بادام اۆسته‌دی.

ندندی آی ندندی،
درمه، نازیک بدندی.
پلوو اۆسته مسکنی،
گؤرن رنگی ندندی؟

هده‌ندی، ها هده‌ندی،
دؤرد قؽراغی بدندی.
یاشیل ووردوم، آل چؽخدی،
گؤره‌سن بو ندندی؟

او تایدا دوران کیشی،
الینده قرآن کیشی.
آتاما دئ آت آلسین،
نه ائرکک، نه ده دیشی.

هده‌ندی ها هده‌ندی،
قارا باغریم زدندی.
بو کولا بیر اود دۆشوب،
گؤرون دردی ندندی؟

عاشیق بیر قان حسابی،
آخی بیر قان حسابی.
بیر سؤز کی یئرده قالا،
او دا بیر قان حسابی.