بایاتی

نامازلی‌یام، نامازی،
آلمیشام دستمازی.
مسجیدین سو، قیبلم ات،
هاردا قؽلیم نامازی؟

آشیق ائلدن یوخاری،
شانا تئلدن یوخاری.
آشیق بیر شئی گؤروبدو،
دیزی بئلدن یوخاری.

یئره ووردوم بالتانی،
آغزی گۆموش خالتانی.
یئردن بیر اوغلان چؽخدی،
ج‍ۆمله جاهان سولطانی.

عزیزی‌یم امر هئی،
بئلده گۆموش کمر هئی.
گؤیده بیر مادیان گؤردوم،
یئرده قولون امر هئی.

بوردان ووردوم بالتانی،
اوردان چؽخدی قالتانی.
آنام بیر اوغلان دوغوب،
یئرین، گؤیون سولطانی.

آی یئل بابا، دور گئدک،
مادیانینی سۆر گئدک.
بیر قاپی‌نین قؽفیلین
مین قاپی‌یا وور گئدک.

آهانی، ها آهانی،
گزر ج‍ۆمله جاهانی.
ایستانبولدان سو ایچر،
تبریز اونون مکانی.

آلتی داشدی، داش دئییل،
اۆستو داشدی، داش دئییل.
حئیوان کیمی اوتلاییر،
حئیوانا یولداش دئییل.

بالاجایام، ساری‌یام،
دئمه‌یین کی، داری‌یام.
سیزه چؤرک اولورام،
زمیلرین باری‌یام.

من عاشیقم تامام قان،
اوخو حرفی تامام قان.
اۆچ یۆز آلتمیش دامارین،
بیری‌سینده تامام قان.

بیر سِحرلی فانارام،
کیبریتسیز ده یانارام.
نه یئرده یوخ، نه گؤیده،
هاوادان ساللانارام.

امیردن آی امیردن،
گۆندو کئچن عؤموردن.
یئمیشلردن هانسیدی،
اؤزیی وار دمیردن.

داغدان-داغا گزرم،
قوشلارا دیل یازارام.
بیر قوش منی آلداتدی،
داها قوشدان بئزرم.

حالالار، های حالالار،
داغدا ککلیک بالالار.
نه کیچی‌یی بؤیویر،
نه ایریسی بالالار.

له‌له‌یم، له‌له‌ندیگیم،
بله‌یه بلندیگیم.
اکدیم، بیچدیم، سوووردوم
بئلیمه شلندیگیم.

عزیزیم قصّاب آغلار،
ساری دون قصّاب آغلار.
اؤلن قویون آغلاماز،
اؤلدورن قصّاب آغلار.

آنام، آتام وار منیم،
سودا خاطام وار منیم.
دؤرد آنادان اولموشام،
اون بئش آتام وار منیم.

من عاشیقم بوز باغلار،
ایری چکر، دۆز باغلار.
بو گۆن بیر حیکمت گؤردوم،
اود ایچینده بوز باغلار.

عاشیق، یارادان اؤلدوم،
بایقو، یارادان اؤلدوم.
کامانسیز اوخا گلدیم،
قانسیز یارادان اؤلدوم.

آشیق سو دئییب آغلار،
یانار، سو دئییب آغلار.
دریادا بیر گۆل بیتیب،
او دا سو دئییب آغلار.