بایاتی

داشداندی، دمیردندی،
خؤره‌یی خمیردندی.
عالمه یئمک وئرر،
اؤزو دویماز ندندی.

نه دیلی وار، نه آغزی،
نه تاری وار، نه سازی.
هر یئردن خبر وئرر،
اوخویار خوش آوازی.

عاشیق، آیه نیشیندی،
اوخور آیه نیشیندی.
کللگؤز گؤیه باخار،
باخماز آیه نیشین دی.

اززی‌یم قان آیاغی،
ککلیگین قان آیاغی.
آشیق بیر شئی گؤروبدو،
اۆچ باشی، اون آیاغی.

قؽزیلگول بئچه وئردی،
سانا، گؤر نئچه وئردی؟
یارپاقسیز آغاج گؤردوم،
تورپاقسیز بئچه وئردی.

امیموغلو اوستادی،
علی کمر اۆسته‌دی.
سودا کؤرپو سالیبدی،
گل گؤر نئجه اوستادی.

بو مئشه گۆل مئشه‌لی،
آلتی تر بنؤوشه‌لی.
بیر کیشی‌نین مین اوغلو،
هامی‌سی بیر پئشه‌لی.

یومرو-یومرو ساریدی،
یومرو گؤزو داریدی.
گزیر بیزیم باغچادا،
اۆچ هفته‌نین باریدی.

داغدان گلیر داغ کیمی،
قوللاری بوداق کیمی.
اگیلیر سو ایچمه‌یه،
بؤیورور اوغلاخ کیمی،

عاشیقم بیر اوو آلدی،
سعی‌یادیم بیر اوو آلدی.
یار آدیم خبر آلسان،
بیر قاف، بیر بئ، بیر دالدی.

ایلیم، ایلیم اینه‌سی،
ایلین خاتین دۆیمه‌سی.
آت اوجاغا، باس قوجاغا،
گئتسین ایللر خسته‌سی.

عاشیق بوساده قالدی،
لبین بوساده قالدی.
آلتی‌سی یوخا چؽخدی،
بیری پوسادا قالدی.

آی دوغدو، آختالاندی،
دوغدوقجا آختالاندی.
بازارا بیر نر گلدی،
یۆز یئردن نوختالاندی.

بیر قوشوم وار آهانی،
گزر ج‍ۆمله جاهانی.
گؤتوررم اؤلدورمه‌یه،
نه اتی وار، نه جانی.

قؽزیلگول پارداخلاندی،
قول آتیب چارداخلاندی.
تورپاقسیز یئرده بیتدی،
یارپاقسیز بوداقلاندی.

عاشیق، یارا دان هانی؟
بایقو یارا دان هانی؟
عالمی حاق یاراتدی،
حاقی یارادان هانی؟

یئری قازدیم، قوم چؽخدی،
قومدان میناره چؽخدی.
بیلدیرکی کئچل اوغلان
بو ایل چینارا چؽخدی.

بوخاری، ها بوخاری،
بوخاریدان یوخاری.
اوردان بیر اوغلان چؽخدی،
چینی قارا چوخالی.

قازدیم، قازدیم، قوم چؽخدی،
قومدان میناره چؽخدی.
بو گئجه اؤلن اوغلان
صاباح بازارا چؽخدی.

بوخاری، آی بوخاری،
تۆستو چؽخار یوخاری.
کندده بیر اوغلان گؤردوم،
اینی یاشیل چوخالی.