بایاتی

اززی‌یم یولو گؤزلر،
داغلاری دولو گؤزلر.
آناسی غۆربتده‌دی،
بالاسی یولو گؤزلر.

ننه، بیزه یاغ گتیر،
اینکلری ساغ گتیر.
چالخانمامیش نئهره‌دن
ارینمه‌میش یاغ گتیر.

خؽردا-خؽردا اؤلدولر،
قبیرلره گیردیلر.
بئش-آلتی آی سو وئردیم،
دیرچلیبن دوردولار.

زۆلفون اوجو گۆموشدور،
سال بوینونا ایلیشدیر.
یئمیشلرین ایچینده
یارپاقسیز نه یئمیشدی؟

اوزون-اوزون درویشلر،
گئجه بیزه گلمیشلر.
او قدر اوینامیشلار،
خورد-خشیل اولموشلار.

گۆندوغاندان گۆن دوغور،
عاشیق عاشیقی بوغور.
آنا اون بئش یاشیندا،
قؽزلاری اوغلان دوغور.

خان پیشی‌ییم سرهاسر،
چؤله چؽخما، یئل اثر.
قوناق بو ایل بوردادی،
گلن ایل ده سرهاسر.

دگیرمانا دن دولدو،
زۆلف اۆزونه بند اولدو.
اۆچ یۆز آلتمیش تاختا
بیر میسمارا بند اولدو.

ائویمه اوزان گلیبدیر،
پرگار پوزان گلیبدیر.
گۆندوز اولان ایشلری
گئجه یازان گلیبدیر.

دریا قؽراغی دۆزدو،
ساناسان اللی، یۆزدو.
اوغلو شاهلیق ائله‌ییر،
آناسی هله قؽزدی.

لبین بیر قدح مئیدیر،
ایچن ابدی هئیدیر.
بابا دئر: منیم دوستوم
ایکی میم، بیر دال، هئیدیر.

بیر بئله‌جه مۆجرونو،
گؤردوم اونون گۆجونو.
یئددی قاتار دوه ده
چکمز اونون گۆجونو.

اوچان بیر قوش کنکدیر،
ایشی تامام کلکدیر.
دگیرمانا جان وئرر،
خؽرمانا دا گرکدیر.

بو یئرلرین داغی یوخ،
باغچاسی وار، تاغی یوخ.
او ندی کی آغلاییر،
گؤزلری‌نین یاشی یوخ.

داغدان، داشدان قان گلر،
قؽوریلمیش ایلان گلر.
قاباغیندا دورمایین،
قودورموش آسلان گلر.

آرابا گئدر، توزو یوخ،
سودا اۆزر، ایزی یوخ.
چاناقچیدا قؽشلامیش،
آغزی قارا، گؤزو یوخ.

لینده، آی لینده،
گۆل بوینونو اینده.
یئییلر کال واختیندا،
یئمک اولماز دگنده.

من عاشیقم، دۆز یئرده،
او گؤیده‌دی، بیز یئرده،
او یئر اولماز کئچمه‌سین،
سالماز بیرجه ایز یئرده.

تاباق تاباق ایچینده،
صبحو صاباح ایچینده.
دایانیب آیاق اۆسته،
عطری ده وار ایچینده.

اۆزرریک دانا-دانا،
اوجاقدان گؤتور سانا.
نظری بد اولانین
گؤزلری اوددا یانا.