بایاتی

ساندیق ساندیق ایچینده،
قؽزیل ساندیق ایچینده.
آرازا بیر اود دۆشدو،
بیز ده یاندیق ایچینده.

عزیزی‌یم آی مدد،
اۆلکر مدد، آی مدد.
دان اولدوزو دیکلندی،
آیریلیقدی، آی مدد.

هونگ هونگ ایچینده،
هونگ ده زنگ ایچینده.
نه یئرده‌دی، نه گؤیده،
اصیل فیرنگ ایچینده.

حئیرانام بوز بؤرکونه،
قونوبدو توز بؤرکونه.
یایین، بدنزر چوخدو،
دگمه‌سین گؤز بؤرکونه.

آغ آت بیان ایچینده،
قویروغو قان ایچینده.
گئتدیم قانی سیلمه‌یه،
قالدیم بیان ایچینده.

یاریم یوللاندی ایشه،
یولو دۆشدو ائنیشه.
نولا بیر بولود گله،
گؤیدن یئره نم دۆشه.

قوتو قوتو ایچینده،
ساندیق قوتو ایچینده.
فاطمانین آغ یایلیغی،
او دا قوتو ایچینده.

بو داغی آشماق اولماز،
نارینجی باشماق اولماز.
باشا گلن گله‌جک،
قضادان قاچماق اولماز.

آپار بازارا منی،
وئرمه نظره منی.
آچ بئلیندن شالینی،
دۆشور مزارا منی.

له‌له‌یم من بو داشدان،
بو قایادان، بو داشدان.
نه کیمی وار، نه کیمسم،
یارانمیشام بو داشدان.

گۆل سنی، تیکن سنی،
گؤز گؤردو تیکن سنی.
هئچ کیمسه یؽخماز عاشیق،
یؽخماسا تیکن سنی.

عاشیقم آشدان-آشدان،
سن کیرپیکدن، من قاشدان.
نه آتام یوخ، نه آنام،
یارانمیشام آغ داشدان.

عاشیقین دۆزن ایشی،
مۆشکولدور دۆزن ایشی.
عالم یؽغیلسا، بیلمز
حاق اؤزو دۆزن ایشی.

اۆزرلیکسن، هاواسان،
هر بیر درده داواسان.
بالاما کج باخانین
گؤزلرینی اوواسان.

گؤیده اولدوز ویدادی،
قارداش بویو جیدادی.
اۆرکسیز چؽخما یولا،
موراد وئرن خودادی.

علی‌یم، اولان گۆندن،
دریالار دولان گۆندن.
روحوم روحون سئویبدیر،
روحلار خلق اولان گۆندن.

دریا بول سو اولایدی،
دیبی یوسون اولایدی.
یاری کاما چکمه‌یه
منده اووسون اولایدی.

گئتمیش ایدیم سووا من،
آلاممادیم دووا من.
سرگردان بیر قوش اولدوم،
تیکممه‌دیم یووا من.

من عاشیق تئل مداری،
داغیتدی سئل مداری.
گؤیدن نور تؤکولمه‌سه،
کسیلر ائل مداری.

آی قؽز، آدین وار سنین،
مئیخوش دادین وار سنین.
هامی حسرتین چکیر،
یوخسا جادین وار سنین؟!