بایاتی

عزیزیم گز دوستونو،
بیر زامان گز دوستونو.
یۆز ایل یۆز ایله گئتسه،
دوست آتماز اؤز دوستونو.

عزیزیم گؤر دۆگونو،
آی دوغدو، گؤردو گۆنو.
نامردده سیرّ ایلنمز،
مرد دئمز گؤردوگونو.

دان یئری قؽزاراندا،
گل گزک بیز آراندا.
قالسا دا اوغلان قالسین،
قالماسین قؽز آراندا.

تبریز منیم زمیمدیر،
دریا اۆسته گمیمدیر.
اون تۆمن زیانیم وار،
مین تۆمن چم-خمیمدیر.

بو یئرده گۆلن اولسا،
تریمی سیلن اولسا.
قارداشلیق گؤزل شئیدیر،
قدرینی بیلن اولسا.

گلین وار، نس دئیندیر،
گلین وار، پیس دئیندیر.
گلینه قوربان اولوم،
اوغلومو ایسته‌یندیر.

هئیأتلری سوغانلیق،
سویو گلیر بولانلیق.
تزه چؽخان چیتلردن.
یارا آللام تومانلیق.

سولار آرخا دولاندی،
دولدو چارخا، دولاندی.
گۆنودن قورخان گلین
قورخا-قورخا دولاندی.

یئزنه، یئزنه، جان یئزنه،
گل بیزه مئهمان، یئزنه.
کؤچون داغدان گلنده،
بیر قوزو قوربان، یئزنه.

دایی، دایی، جان دایی،
جان سنه قوربان دایی.
آنام پیلوو بیشیریب،
گل بیزه مئهمان، دایی.

یار گۆل تاخیب تئلینه،
الین ووروب الینه.
قوی ساغ اولسون قایناتا،
حؤرمت ائلر گلینه.

دییرمان اۆسته چیچک،
یارپاغی لچک-لچک.
قارداش بیر قؽز سئویبدی،
اوزونبوی، قارابیرچک.

یئزنه، یئزنه، یئزدیجه،
شاهین-شونقار گؤزلوجه.
یئزنم آراندان گلیر،
اتکلری توزلوجا.

ساریمساغیم، سوغانیم،
یاد قؽزیندان دوغانیم.
جاندان اولوب جانیمی،
ایلان کیمی بوغانیم.

سن منیم آغا قاینیم،
دولان گل باغا، قاینیم.
قوچوم یوخ، قوربانیم یوخ،
جانیم صاداقا، قاینیم.

گیردیم باغا نار اۆچون،
هئیوا دردیم یار اۆچون.
آنالار قؽز بسله‌میش
ایگید اوغلانلار اۆچون.

بیر قوش گلیر آغداشدان،
خبر وئرین قارداشدان.
قارداش باجیدان دویسا،
باجی دویماز قارداشدان.

بولاق باشی بوز باغلار،
دؤرد یانی یارپیز باغلار.
سونسوزا قوناق گلسه،
آتین توتار قؽز باغلار.

آشیق دویماز سؤزوندن،
قان-یاش تؤکمز گؤزوندن.
ار آدینی چکمه‌یین،
گلین گئدر اؤزوندن.

یئرپه‌نه‌‌یی سویارلار،
آل-یاشیلا بویارلار.
چاغریلمامیش قوناغی
آستانادان قووارلار.