بایاتی

مجلیسده وار بادالار،
ساقی آلار سادالار.
علی آچیق، گؤزو توخ
سۆفره آچار، آد آلار.

میخک اکدیم بیری تر،
بیری قؤنچه بیری تر.
بگله بوستان اکنین
تاغی بئلینده بیتر.

آشیق باریندان کئچر،
گلر، باریندان کئچر.
نامردله دوست اولانین،
عؤمرو یاریدان کئچر.

صیّاد، قلبین نه شندیر،
داغدان اووون دۆش، ائندیر.
یوخدور پولون وفاسی،
الدن-اله دۆشندیر.

دردی، غمی، آت کئچر،
درد اولسا قات-قات، کئچر.
ساکیت دولان، صبر ائله،
عؤمرون سالامات کئچر.

آشیق جفا نه بیلیر،
سئیرو-صفا نه بیلیر.
اغیاردان دوستلوق اومما،
اغیار وفا نه بیلیر.

هر کیم ادبتلبدیر،
سعادته سببدیر.
اینسان ایله هئیوانین
تفاووتو ادبدیر.

گۆندور گلیر، بوش کئچیر،
عؤمرو گۆنه قوش، کئچیر.
کئچن گۆن کئچدی، گئتدی،
گلن گۆنو خوش کئچیر.

دومان داغا پرده‌دیر،
گؤیده دئییل، یئرده‌دیر.
آغالیق دؤولت اولسا،
ایگیدلیک هۆنرده‌دیر.

یئل اسنده گۆل اینجیر،
بۆلبول اینجیر، گۆل اینجیر.
یاد باغبان، باغا گیرمه،
یارپاق دۆشر، گۆل اینجیر.

بابام دئییر بس ندیر،
یوخو آدام اسنه‌دیر.
گئج یاتماق، تئز اویانماق
دؤولت دئییل بس ندیر؟

بیر قوش گلیر آلادیر،
یئری، یوردو تالادیر.
کاسیبلیق پیس اولسا دا،
دؤولت باشا بلادیر.

یول اۆستونده داش ندیر؟
دۆز یولدا چاشباش ندیر؟
اؤزون کی یؽخیلمیسان،
آخیتدیغین یاش ندیر؟

عزیزیم یار آشیقدیر،
بو یارا یار آشیقدیر.
چوخ بیلیب، آز دانیشماق
ایگیده یاراشیقدیر.

ائله‌می شانه‌سیدیر،
بو زۆلفون شانه‌سیدیر.
هر ایشده کامیل اولماق
عاقیل نیشانه‌‌سیدیر.

دؤران چوخ قاریشیقدیر،
یاد گلیب باریشیقدیر.
آییق-ساییق دولانماق
ایگیده یاراشیقدیر.

مینسن، آت یاخشی شئیدیر،
تمیز ذات یاخشی شئیدیر.
دۆشمن ضعیف ده اولسا،
احتیاط یاخشی شئیدیر.

داغدا یول-ایز یاخشیدیر،
هر یان نرگیز یاخشیدیر.
یئددی فرسیز اوغولدان
بیر فرلی قؽز یاخشیدیر.

اون بیر اوندان یاخشیدیر،
چوخا دوندان یاخشیدیر.
یاغی‌یا بویون ایسن،
اؤلمک اوندان یاخشیدیر.

الده اسا، یاخشی دور،
یاخشی دانیش، یاخشی دور.
یاخشی ایگید یوردوندا،
پیس قالماسا یاخشیدیر.