بایاتی

یار گرک یانان اولسون،
هر دردی قانان اولسون.
دوست تاپدین، ائله دوست تاپ،
ساییلان، سانان اولسون.

آشیغین زیل سسی وار،
هم زیلی، هم پسی وار.
سؽندیرما یار کؤنلونو،
اونون دا کیمسه‌سی وار.

مئیوه گرک تر اولسون،
اؤولاد گرک نر اولسون.
ایگیده یاراشیقدیر،
آد قازانسین، ار اولسون.

بولاق اۆسته بستی وار،
بستی‌نین بیر دستی وار.
سیرّ وئرمه اؤز دوستونا،
دوستون دا بیر دوستو وار.

باغا گیردیم بار اۆچون،
هئیوا اۆچون، نار اۆچون.
اسیرگه‌مه جانینی
بیر وفالی یار اۆچون.

الینده بایداسی وار،
بایدانین قایداسی وار.
سونرادان پئشمانچیلیق،
اونون نه فایداسی وار.

سؽغال وورار تئله او،
کمر باغلار بئله او.
ایگیدی ائل ساخلایار،
آرخا اولسا ائله او.

الینده لالاسی وار،
قلبینده نالاسی وار.
گئدیرسن جاوانا گئت،
قوجانین بالاسی وار.

داغی، داشی گزدی یار،
درد الیندن بئزدی یار.
سن سؤزونو آچیق دئ،
سؤز کیمیندی، تئز دویار.

داغلارین تالاسی وار،
گۆن دۆشوب آلاسی وار.
مرددن اوزاق دولانما،
نامردین بالاسی وار.

من عاشیق گؤز یئری وار،
اۆزونده گؤز یئری وار.
مجلیسده مقام گؤزله،
هر سؤزون اؤز یئری وار.

داغ باشیندا دومان وار،
یار گله‌جک، گۆمان وار.
گؤسترمه آی جامالین،
حسرت چکن، اومان وار.

سو اۆسته بیر پری وار،
چوخلو درد-سری وار.
هر نه دئسن قؽزا دئ،
آروادلارین اری وار.

عزیزی‌یم بوسان وار،
یول اۆستونو بوسان وار.
بیر جۆت نار بسله‌میسن،
گیزله، اوموب کۆسن وار؟

قده‌یی بئز قوجالدار،
یئگ ساللان، گز، قوجالدار.
آروادین دئیینگه‌نی
کیشینی تئز قوجالدار.

من عاشیقم بوداقلار،
باغبان باغی بوداقلار.
آنا گزن بوداغی،
بالا بیر-بیر بوداقلار.

داغ باشی سسلی قالار،
اوجاغی هیسلی قالار.
یئمک ایلن دوست اولان
ایللرله کۆسلو قالار.

اۆز توتوب قافا باغلار،
چؽخیبدی صافا باغلار.
بیر دوست بی‌وفا اولسا،
کیم اونا وفا باغلار.

داغ اۆسته دومان قالار،
یاغیشا گۆمان قالار.
یاغ یاغ ایله قاریشار،
یارمالار یاوان قالار.

آشماغا آسان داغلار،
قار باشین باسان داغلار.
یئتیم چوخ چتین گۆلر،
آغلاسا هاساند آغلار.