بایاتی

من عاشیق ار شاباشی،
برگوشاد، عرشه باشی.
نامرددن کیشی اولماز،
یئتیشسه عرشه باشی.

عزیزی‌یم یاخشی بیل،
یاخشی اؤیرن، یاخشی بیل.
اؤزونه یاخشیلیغی
اؤزگه‌یه ده یاخشی بیل.

آشیق نئیلر یاد آشی،
چاخچاخ دؤیر ها داشی.
بۆلبول ایلن یولداش اول،
گۆلو باغدان ها داشی.

باشا گئیمیش یا مندیل،
سنی ائلر یامان دیل.
له‌له، فنا دۆنیادا،
یا زربافت گئی، یا مندیل.

عزیزی‌یم قاش داشی،
گؤهر داشی، قاش داشی.
جاهیل ایله بال یئمه،
آهیل ایله داش داشی.

سایادیم ساییق دئییل،
یاتیبدی، آییق دئییل.
سؤز وئریب اۆز دؤندرمک
هئچ یارا لاییق دئییل.

عزیزی‌یم تمیز اول،
صاف اۆرک قره‌زسیز اول.
ادبین، علمین اولسون،
هر یئرده ده عزیز اول.

عزیز اوغلوم، ناز اوغلوم،
درسیندن قالماز اوغلوم.
قلمین آل الینه،
آرز-کامین یاز، اوغلوم.

دوستون بیر تک دوستو اول،
آرخا-دیرک دوستو اول.
دوست دئییب، دوست اولاندا
سؤز یوخ، اۆرک دوستو اول.

منیم عزیز، گۆل اوغلوم،
گۆل اوغلوم، بۆلبول اوغلوم.
درسین اوخو روانلا،
سونرا دانیش، گۆل اوغلوم.

ائله‌میدیر مرده قول،
ائیله منی مرده قول.
فۆرصتی بادا وئرمز
قاچاق ایگید، مرد اوغول.

عزیزیم ایچمه، دوستوم،
هر سودان ایچمه، دوستوم.
اویما اغیار سؤزونه،
دوستوندان کئچمه، دوستوم.

مرد آنادان مرد اوغول،
نامرده بگ، مرده قول.
قورخاق تؤهمت آرتیرار،
باش اوجالدار مرد اوغول.

اوغلوم، چکین یالاندان،
یالان-یامان، ایلاندان.
ایلان ووران ساغالار،
ساغالمازسان یالاندان.

باغچادا آچیلیب گۆل،
مۆشتاقدیر اونا بۆلبول.
عؤمور کئچر، قاری‌یار،
قاریماز هئچ واخت کؤنول.

بیر گۆل آلدیم اوخاندان،
آلیب آسدیم یاخامدان.
بیر لال آخان سودان قاچ،
بیر ده یئره باخاندان.

شیتیلدیر، کوران دئگول،
بیتیبدیر گوراندا گۆل.
دوستو گؤرنده آغلا،
دۆشمنی گؤرنده گۆل.

عزیزیم او تاغیندان،
قاشلارین او تاغیندان.
مردین تؤیله‌سی یاخشی،
نامردین اوتاغیندان.

من عاشیقم یئنه گۆل،
ال چال، اوینا، یئنه گۆل.
دۆنیاجا غمین اولسا،
دۆشمن گؤرسن یئنه گۆل.

داغلارین هاراییندان،
ائل کؤچدو هاراییندان.
مردین داخماسی خوشدور،
نامردین ساراییندان.