بایاتی

گۆلو سن در، دئ منده،
هیجرانین دردی منده.
یۆز نادان قوربان اولسون
بیر نفر دردیمنده.

عزیزیم یول ائله‌مه،
دردیمی بول ائله‌مه.
باسما باغین چپرین،
دۆشمنه یول ائله‌مه.

عزیزیم یامان گۆنده،
بوینومدا یامان گۆنده.
بیر یاخشی یۆز یاشاسین،
اؤلسون یۆز یامان گۆنده.

عاشیقم بیر جانانا،
بیرجه گۆل، بیرجه نانا.
هر جانانا جان وئرمه،
جانی وئر بیر جانانا.

عزیزیم آمان گۆنده،
سؤزون دئ آمان گۆنده.
دوست کیمدی، دۆشمن کیمدی،
تانیرسان یامان گۆنده.

عزیزیم او لنگینه،
ایگیدین او لنگینه.
اۆرگینده کین اولان
گؤز تیکر اؤلن گۆنه.

عزیزینم سنگینه،
مینا گردن سنگی نه؟
شاهین-شونقار سؽغینار
یالچین داغلار سنگینه.

یاخشی دوستدان یاد اولماز،
یاد اۆرگی شاد اولماز.
دۆشمن یۆز نعمت وئرسه،
هئچ بیرینده داد اولماز.

چای قؽراغی چته‌نه،
گۆل گؤندردیم وطنه.
الله قیسمت ائله‌سین
اؤز کؤنلومه یاتانا.

داغ باشیندا ایز اولماز،
ایز اولسا دا دۆز اولماز.
دوه آدامسیز اوتلار،
سۆرو چوبانسیز اولماز.

سؤزون دئمه ترسینه،
تر تنی قوی، ترسینه.
سو اؤز سمتینه آخیر،
دؤران گئدیر ترسینه.

بو داغدا آری اولماز،
داغلارین باری اولماز.
ایکی دیللی عاشیقین
سئویملی یاری اولماز.

بو یئرلر قالین مئشه،
یانیمدا اول همیشه.
آرانیندا گۆل بیتسین،
یایلاغیندا بنؤوشه.

تنبلدن کؤمک اولماز،
کیمسه‌یه گرک اولماز.
ایشینده چالیشگیلن،
زحمتسیز یئمک اولماز.

عزیزیم سرین آیاز،
گؤی بولود، سرین آیاز.
دوستا گلن قادانی
دۆشمنین سرینه یاز.

ائله‌می هؤرن اولماز،
یار تئلین هؤرن اولماز.
شاهین ظۆلمو یۆز اولار،
رحمینی گؤرن اولماز.

آخار سو گئدر، قالماز،
اۆرکده کدر قالماز.
وفالی‌یا جان قوربان،
بی‌وفا گئدر، قالماز.

عزیزیم گۆلشن اولماز،
بیر گۆلله گۆلشن اولماز.
دوست-دوستدان اینجیک اولسا،
اینجی‌یر، دۆشمن اولماز.

اولدوز گؤیده ساییلماز،
چی یومورتا سویولماز.
ایکی کؤنول بیر اولسا،
بیر-بیریندن آیریلماز.

یای گۆنونده قار اولماز،
سؤیود قالخار، بار اولماز.
ایکی دیللی گؤزلده
عهده اعتیبار اولماز.